ფარცხალაშის "ნარუშილოვკა" და დაკეტილი შსს - ყოფილი მთავარი პროკურორისთვის საშვის გაცემის საკითხი კვლავ ბუნდოვანია

პოლიტიკა - 15:00, 27 Apr, 2020

923

ოთარ ფარცხალაძისთვის საშვის გაცემის საკითხი კვლავ ბუნდოვანია - არც შსს და არც მთავრობის ადმინისტრაცია ოპოზიციის კითხვებს არ პასუხობს.

შინაგან საქმეთა სამინისტროში საკრებულოს დეპუტატმა ლევან ხაბეიშვილმა გომელაურის უწყებაში სპეციალური განცხადების შეტანა ვერ შეძლო.

ენმ-ს წევრს უწყება დაკეტილი დახვდა.

ხაბეიშვილი ფარცხალაძის დაჯარიმების ქვითრის გასაჯაროებას ითხოვს.

"შინაგან საქმეთა სამინისტრო არის დაკეტილი. განცხადების შეტანა ფაქტობრივად შეუძლებელია. 3 კანონდარღვევაა სახეზე. ან გამოგვიგზავნონ 3-ლარიანი ფარცხალაძის ქვითარი, რომელიც დააჯარიმეს და განმეორების შემთხვევაში მას 6-წლიანი თავისუფლების აღკვეთა ემუქრება, ან მინისტრმა და სამინისტრომ ახსნას, რანაირად ხდება, რომ სხვა ადამიანებს 3-ლარიან ჯარიმას უწერენ მაშინ როდესაც მაგალითად მეუღლე უზის წინ, და ფარცხალაძეს საშვის გარეშეც შეუძლია წინ დაისვას თანმხლები პირი და ფეხებზე დაიკიდოს კანონი", - განაცხადა ხაბეიშვილმა.

ფაქტს "ევროპული საქართველოს" წევრი ირაკლი აბესაძეც გამოეხმაურა. მისი თქმით, ადგილი გვაქვს საზოგადიების აბუჩად აგდებასთან.

"ნეპოტიზმის, ფავორიტიზმის, კორუფციის პირობებში "ქართული ოცნების" ხელისუფლებისთვის ამ უმძიმესი კრიზისის დროსაც კი, ზრუნვის საგნად რჩება არა საზოგადოების ინტერესები, არამედ მისი ცალკეული წევრების, ხელისუფლების ფავორიტი ადამიანების კეთილდღეობა. ეს არის დანარჩენი საზოგადოების აბუჩად აგდება, რომელიც ხელისუფლებამ უმანქანოდ სახლში გამოკეტა, მათი დიდი ნაწილი ამის გამო დატოვა შემოსავლის გარეშე და თითოეულ მათგანს მნიშვნელოვნად გაურთულა ცხოვრება", - აღნიშნა ოპოზიციონერმა დეპყრარმა.

სისტემურ პრობლემებზე საუბრობს "ლელოს"- წევრი კახა კოჟორიძე. მან ხელისუფლება ძალაუფლების ბოროტად გამოყენებაში ადანაშაულებს.

"ბატონი ოთარი ცნობადი სახეა და მაგიტომ გახდა ჩვენთვის ცნობილი ეს ამბავი, თორემ ისე, რომ მასიურად ხდებოდა არასწორად ჩვენი შეფასებით ამ საშვების და ნებართვის გაცემა, ამის დამადასტურებელი მტკიცებულება ყველა ადამიანს შეეძლებოდა დაენახა მარტივი მოქმედებით. მათ როგორც სჩვევიათ ხოლმე საშვებს გასცემდნენ თავიანთ ნათესავებზე, მეგობრებზე, საძმო-სანაცნობოზე. ვსაუბრობთ სავარაუდო სისტემურ დარღვევაზე. ამ შემთხვევაში მხოლოდ ოთარ ფარცხალაძის დარღვევაზე კი არ მინდა აქცენტი გავაკეთო, აქ მთავარია სისტემა როგორ მუშაობს", - აღნიშნა კახა კოჟორიძემ.

იმ პირობებში, როცა საქართველოს მოქალაქეების უმრავლესობას საგანგებო მდგომარეობის გამო ავტომობილებით გადაადგილება შეზღუდული ჰქონდა, ყოფილი გენერალური პროკურორი, ოთარ ფარცხალაძე რუსთაველის გამზირზე ავტომანქანით დააფიქსირეს.

თითქმის ცარიელ რუსთაველის გამზირზე ოთარ ფარცხალაძე შავი “რეინჯ-როვერით” გადაადგილდებოდა. ავტომობილს ის თავად მართავდა, გვერდით კი კიდევ ერთი მგზავრი ეჯდა რომელიც ასევე კანონ დარღრვევაა.

ცნობისთვის, მსუბუქი ავტომანქანების გადაადგილების აკრძალვის შემდეგ მხოლოდ იმ მანქანებს ჰქონდათ მოძრაობის უფლება, რომლებზეც სპეციალური საშვები გაიცემა, რა სტატუსით მიიღო ოთარ ფარცხალაძემ საშვი, ამას "ნიუპოსტი" მთავრობის ადმინისტრაციაში არკვევს.