"პოლიტიკაში ცხოვრებისგან განსხვავებით ცალმხრივი სიყვარული არ არსებობს"- კალაძე სააკაშვილის გამო უკრაინას აფრთხილებს

პოლიტიკა - 10:31, 25 Apr, 2020

746

"ქართული ოცნების" ლიდერების ფორსირებული შეტევა უკრაინის ხელისუფლებას - თბილისის მერი კახა კალაძე მიხეილ სააკაშვილის უკრაინის ვიცე-პრემიერად შესაძლო დანიშვნამ გააღიზიანა.
მმართველი პარტიის გენერალური მდივანი აცხადდებს, რომ სააკაშვილის დაწინაურება ჩრდილს მიაყენებს ქვეყნებს შორის ურთიერთობას.
კალაძე აღნიშნავს, რომ "პირველ რიგში, ეს უკრაინის ამჟამინდელი ხელისუფლების საფიქრალია".

კალაძის განცხადებით, "პოლიტიკური დეჟა ვუ აქვს", როცა უკრაინის მორიგი პრეზიდენტი სთავაზობს სააკაშვილს თანამდებობას და ზელენსკის ურჩია პოროშენკოს გამოცდილება გააანალიზოს.

"პოლიტიკული დისკომფორტი უნდა იყოს, როცა სტრატეგიული პარტნიორი და მეგობარი ქვეყნის, სამი ინსტანციის სასამართლოს მიერ, ორგზის დამნაშავედ ცნობილ პირს სთავაზობს მაღალ პოლიტიკურ თანამდებობას.

პირველად როგორ დასრულდა სააკაშვილის მოღვაწეობა პოროშენკოს დროს, ძალიან კარგად გვახსოვს და ზელენსკის გუნდმა ეს უნდა გაანალიზოს.

ჩვენთვის უკრაინა არის მეგობარი ქვეყანა და ეს მუდმივი მოცემულობაა, ამას ვერაფერი ვერ შეცვლის და დარწმუნებული ვარ, უკრაინასაც იგივე განწყობა აქვს საქართველოს მიმართ...

ყველას კარგად გახსოვთ ცხოვრების საუკეთესო წლები გატარებული მაქვს ამ ქვეყანაში. ჩემი მეგობრების დიდი ნაწილი ცხოვრობს იქ და გული შემტკივა უკრაინაზე, ვგულშემატკივრობ ისევე, როგორც საქართველოს და მინდა, რომ როგორც პრობლემები, საერთო მტერი და მიზნები გვაერთიანებს, ასევე ერთიანები ვიყოთ ყველა ასპექტში, ყველა საკითხში.

პოლიტიკაში ცხოვრებისგან განსხვავებით ცალმხრივი სიყვარული არ არსებობს, არ გამოდის ცალმხრივი პარტნიორობა და მეგობრობა, არ გამოდის ცალმხრივი ანგარიშგაწევა და თანდგომა",- თქვა კალაძემ.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის შეწყვეტის მიზეზი გახდეს. ამის შესახებ მინიშნებები მთავრობის წევრებმა გუშინ ღიად გააკეთეს.