,,ქართული ოცნების’’ სადამსჯელო ოპერაცია სახელწოდებით ,,ყველანი ციხეში’’ - ირაკლი ღლონტი საგანგებო წესების განმეორებით დარღვევისთვის პატიმრობის მისჯის გადაწყვტილებაზე

პოლიტიკა - 21:14, 23 Apr, 2020

913

პარლამენტის მიერ დღეს კარანტინისა და თვითიზოლაციის წესების დარღვევასთან დაკავშირებით მიღებულ ცვლილებებს პარტიის "კანონი და სამართალი" წევრი, ირაკლი ღლონტი გამოეხმაურა და საგანგებო რეჟიმის განმეორებით დარღვევისთვის 6 წლით პატიმრობის მისჯის გადაწყვტილებას "ქართული ოცნების" სადამსჯელო ოპერაცია უწოდა.
ღლონტის განცხადებით, საგანგებო რეჟიმის დარღვევის საფუძვლით პირისთვის 6 წლამდე ვადით თავისუფლების აღკვეთა, პოლიტიკური თვალსაზრისით არის ავტოკრატიული რეჟიმის მორიგი აშკარა დადასტურება.

,,ქართული ოცნების’’ სადამსჯელო ოპერაცია სახელწოდებით ,,ყველანი ციხეში’’. საგანგებო რეჟიმის დარღვევის საფუძვლით პირისთვის 6 წლამდე ვადით თავისუფლების აღკვეთა, პატიმრობა, პოლიტიკური თვალსაზრისით არის ავტოკრატიული რეჟიმის მორიგი აშკარა დადასტურება და იგი ზუსტად გამოხატავს მოქმედი ხელისუფლების ავტოკრატიულ-დიქტატორულ ბუნებას. აღნიშნულ სსკ-ის მუხლზე 6 წლამდე ვადით სასჯელის დაწესება თავის მხრივ შექმნის იმ ხელოვნურ ბარიერს, რომ მოსამართლეს არ ექნება უფლებამოსილება ბრალდებულის მიმართ გამოიტანოს არასაპატიმრო სასჯელი, იგივე პირობითი მსჯავრი, მაშინაც კი თუკი ბრალდებული აღიარებს და ინანიებს ჩადენილ ქმედებას. აღნიშნული უფლებამოსილება მოსამართლეს გააჩნია მხოლოდ და მხოლოდ მაშინ, როდესაც დანაშაული ითვალისწინებს 5 წლამდე ვადით პატიმრობას. ხელისუფლების მიერ ინიცირებული ეს ცვლილება ემსახურება პრინციპს ,,ყველანი ციხეში’’ და მიმართულია იმ პირთა ციხეში განსამწესებლად, ვინც არ სარგებლობს მმართველი პარტიის პრივილეგირებულთა სიაში ყოფნით. ზემოაღნიშნულის გარდა მმართველი ძალის გამოვლენილი ნება სრულ წინააღმდეგობაშია თანაზომიერების უმნიშვნელოვანეს პრინციპთან, რომლითაც ევროპის წამყვანი ქვეყნების მსგავსად ხელმძღვანელობს საქართველოს საკონსტიტუციო სასამართლო ნორმის კონსტიტუციურობის შეფასებისას. აშკარაა, რომ სახეზე გვაქვს ადამიანის უფლებების იმაზე მეტად შეზღუდვა, ვიდრე ის აუცილებელია დემოკრატიული საზოგადოებისთვის" - აღნიშნა ირაკლი ღლონტმა.