საქართველოს პარლამენტმა „სისხლის სამართლის კოდექსში“, ასევე „ადმინისტრაციულ სამართალდარღვევათა კოდექსში სამი მოსმენით ახალი ნორმები შეიტანა.

საპარლამენტო უმრავლესობის ლიდერის მამუკა მდინარაძის განცხადებით, ადმინისტრაციულ სახდელდადებული პირი საგანგებო და კარანტინის რეჟიმის დარღვევისთვის ექვს წლამდე თავისუფლების აღკვეთით დაისჯება.

ცვლილებით, თუ საგანგებო მდგომარეობის გამოცხადების შემდეგ, პრეზიდენტის დეკრეტით თუ სხვა ნორმატიული აქტებით დადგენილ წესს დაარღვევს პირი, პირველ შემთხვევაში ისჯება 3-ათასლარიანი ჯარიმით (იურიდიულ პირს 15 ათასი ლარი) განმეორების შემთხვევაში, პირი დაისჯება 6 წლამდე თავისუფლების აღკვეთით.

მამუკა მდინარაძის განმარტებით, ეს ზომები და ერთი ახალი მუხლი საჭირო გახდა, რადგან სამართალდარღვევის განმეორების შემთხვევაში სასჯელი "განჭვრეტადი" არ იყო.

"კონკრეტული რეგულაცია არსებობს, რომელიც პრეზიდენტის დეკრეტითაა გათვალისწინებული, მაგრამ ეს ქმედება, როგორც დანაშაული, პირველად შემოვიდა სისხლის სამართლის კოდექსში. ასევე მითითებაა, რომ თუ პრეზიდენტის დეკრეტით სხვა რამ არის გათვალისწინებული, ამ შემთხვევაში მოქმედებს დეკრეტით გათვალისწინებული სანქცია", - ამბობს მდინარაძე.