ოპოზიციას სალაპარაკო გამოელია და რუსეთმა "თემა გადმოუგდო": ლადო კახაძე საოკუპაციო ზოლის გადმოწევაზე

პოლიტიკა - 08:21, 22 Apr, 2020

610

საპარლამენტო უმრავლესობის წევრი, მაჟორიტარი დეპუტატი ლადო კახაძე აცხადებს, რომ ოპოზიცია რუსეთიდან იმართება, ხოლო საოკუპაციო ზოლის გადმოწევა სოფელ ტახტისძირთან არაფერია, თუ არა რუსეთის მიერ ოპოზიციისთვის გადმოგდებული თემა, რადგან "ოპოზიციას სალაპარაკო თემა გამოელია",

ამის შესახებ დეპუტატმა პალიტრანიუსის ეთერში განაცხადა.

"...ოპოზიცია იქიდან იმართება. ყველაფერს გააკეთებენ, რომ მაქსიმალურად, აი, ამ ბრძოლაში შესულ ხელისუფლებას, რომელიც კოორდინაციითაც, იერარქიითაც, პრიორიტეტების მინიჭებითაც, საკონსულტაციო საბჭოთი, რომელიც მართავს, არა დიქტატურული საბჭოთი, აი, ეს ყველაფერი არ მოწონს ამ ქვეყანას და ზუსტად იმას აკეთებს.

სავარგულებს გადაუვლიან, გადახნიან და იმის იმედად არის საქართველო, რომ იქ მოყვანილი ხეხილით ან კიტრით და პომიდორით ირჩინოს მერე თავი და ეს თემა იქნება ოპოზიციის სალაპარაკო. მე ეს ვიცი რომ იქნება, მზადა ვარ ამისათვის", - ამბობს ლადო კახაძე პალიტრანიუსთან ინტერვიუში.

შეგახსენებთ, ქარელის რაიონის სოფელ ტახტისძირში რუსმა ოკუპანტებმა საოკუპაციო ზოლი გადმოსწიეს. მიტაცებულ ტერიტორიაზე მოექცა ადგილობრივი მოსახლეობის სახნავ-სათესი მიწები. მომხდარს მაშინვე გამოეხმაურა აშშ-ის საელჩო საქართველოში და დე ფაქტო ცხინვალის ხელისუფლებას მოუწოდა შეწყვიტოს ნებისმიერი კონსტრუქციის, ნიშნის, ღობისა თუ ბარიერის აღმართვა.