"გუშინ პოლიციელმა ქალი მოკლა და ეს ცეკვავს!.. ყველა იმ უნიჭოდ აცეკვებულ ფეხებზე ვკიდივართ!" - ნიკა მელია TikTok-ზე ბიძინა ივანიშვილის გამოჩენას გამოეხმაურა

პოლიტიკა - 07:46, 22 Apr, 2020

1414

ენმ-ს პოლიტსაბჭოს თავმჯდომარე ნიკა მელია "ტიკტოკზე" ბერასთან ერთად ბიძინა ივანიშვილის გამოჩენას ეხმიანება და პარადოქსულად მიიჩნევს, რომ ქვეყანაში არსებული პრობლემების ფონზე ბიძინა ივანიშვილი ბერასთან ერთად კლიპში ცეკვავს.

არა, ეს არაა უბრალოდ უნიჭობა, ან გოიმური ვიდეო. ეს გახლავთ ღრმად კონცეპტუალური არტი.არაფერი ისე ზუსტად არ გადმოსცემს ქვეყნისა და ხალხის მიმართ მის ცინიკურ დამოკიდებულებას, როგორც პანდემიის დროს, ორთვიანი გაუჩინარების შემდეგ ამ ფორმით გამოჩენა.

სხეულის ენით, პლასტიკით, ცეკვით და კუნტრუშით გვითხრა ის, რაც ისედაც ვიცოდით - რომ ყველა იმ უნიჭოდ აცეკვებულ ფეხებზე ვკიდივართ. თან მარტო ჩვენ, ხალხი კი არა, საკუთარი მთავრობაც ჰკიდია და საკუთარ მთავრობასაც დასცინის.

ცინიზმის რა დონეზე უნდა იყო, რომ ჯერ ასეთი იდეა მოგივიდეს თავში, მერე ივარჯიშო, შემდეგ გადაღება დაგეგმო, ჩაშარვალ-ჩაკოსტუმ-ჩაჰალსტუხდე და ეს გადაიღო!

გუშინ, პოლიციელმა, რომელშიც როგორც ლაშა ნაცვლიშვილი ამტკიცებს, ბიძინაა ჩასახლებული, ქალი მოკლა და ეს ცეკვავს!

ხალხი სულს ღაფავს და ეს ცეკვავს!

ხალხის მასხრად აგდება არავის შერჩენია...

პ.ს.

ვიდეოს ალბათ ირაკლი ღარიბაშვილი უღებდა, უცხოს არ გაიკარებდნენ...", - წერს ნიკა მელია.
შეგახსენებთ, კორონავირუსის გავრცელების შემდეგ საზოგადოებაში თითქმის არ გამოჩენილა მილიარდერი, ყოფილი პრემიერმინისტრი ბიძინა ივანიშვილი, გუშინ კი პორტალ "ტიკტოკზე" ბერასთან ერთად მოკლე ვიდეორგოლში გამოჩნდა, სადაც რეპერ შვილთან ერთად სახალისო მისალმებას ასრულებს, ბოლოს კი კადრიდან შვილთან ერთად გადის.