ერთობლივი ანტიტერორისტული ცენტრი რუსეთ-საქართველოს ურთიერთობის დათბობის სანაცვლოდ: ლავროვის მინიშნება ოფიციალურ თბილისს

პოლიტიკა - 16:35, 21 Apr, 2020

1943

რუსეთის ფედერაციის საგარეო საქმეთა მინისტრმა სერგეი ლავროვმა, ვიდეოპრესკონფერენციაზე, პრიმაკოვის ფონდის საქართველოს ფილიალის ხელმძღვანელის დიმიტრი ლორთქიფანიძის შეკითხვას უპასუხა და განაცხადა, რომ საქართველოსა და რუსეთს შორის კავშიორების გაწყვეტის ინციატორი არ ყოფილა რუსეთი, ხოლო ურთიერთობების დათბობის შესაძლებლო9ბაზე საუბრისას ერთობლივი ანტიტერორისტული ცენტრის შექმნის აუცილებლობაზე მიანიშნა და აღნიშნა, რომ ამგვარი შეთანხმება (ერთობლივი ანტიტერორისტული ცენტრის გახსნა 30 რუსი და 200 ქართველი სპეციალისტით, - რედ.) პუტინ-სააკაშვილის შეთანხმებაში შედიოდა, როცა მათ საქართველოდან რუსეთის ბაზების გაყვანის შესახებ შეთანხმებას მიაღწიეს:
„პუტინმა და სააკაშვილმა საქართველოდან რუსეთის ბაზების გაყვანაზე მოლაპარაკების ერთ-ერთი რაუნდის დროს მიაღწიეს შეთანხმებას, რომ შეიქმნებოდა რუსეთ-საქართველოს ერთობლივი ანტიტერორისტული ცენტრი, რომელიც იმ რეგიონში ან მათ სიახლოვეს უნდა გახსნილიყო, სადაც რუსული სამხედრო ბაზები იყო დისლოცირებული. იქ უნდა ემუშავა 30 რუს და 200 ქართველ სპეციალისტს. ეს იქნებოდა ერთგვარი სიმბოლო, რომ საქართველოსა და რუსეთის ერთიანი მტერი არის ტერორიზმი და მაშინ პანკისის ხეობაში იყო არასტაბილური ვითარება.

ამიტომ ეს ცენტრი იმუშავებდა ამ საკითხებზე, მაგრამ შემდეგ ქართულმა მხარემ შეთანხმების ამ პუნქტის რეალიზებაზე უარი თქვა. ვფიქრობ, თუ მაშინ გამოიჩენდნენ უფრო მეტ პატივისცემას ამ შეთანხმების მიმართ, ამას შეეძლო მოვლენების განვითარების სცენარი შეეცვალა. ეს იქნებოდა ჟესტი, რომელიც ფაქიზ სფეროში ნდობისა და თანამშრომლობის კარგი საფუძველი გახდებოდა. ამიტომ, რუსეთი მზად იქნება, ქართველი მეზობლების კონსტრუქციულ ნაბიჯებს გამოეხმაუროს და რუსეთი ამით დაინტერესებულია“, – განაცხადა სერგეი ლავროვმა.