მიხეილ სააკაშვილის საპრეზიდენტო ბიბლიოთეკა განცხადებას ავრცელებს და ბიბლიოთეკის დამწვარი ნაწილის აღდგენაში მონაწილეობის მსურველ მოქალაქეებს მიმართავს:

"19 აპრილს, აღდგომის ბრწყინვალე დღესასწაულზე სააკაშვილის საპრეზიდენტო ბიბლიოთეკას ცეცხლი წაუკიდეს. თავხედური თავდასხმის ჩამდენი და შემკვეთებიც დღეს ყველასთვის ცნობილია.

ზარალი საკმაოდ დიდია, დამწვარია ბიბლიოთეკის 80 კვ მეტრამდე, განადგურებულია ავეჯი, გაყვანილობა, ტექნიკა, გამჭვარტლულია შენობის 4 სართული, ჩამსხვრეულია პირველი სართულის ფასადის მინები და შიდა ტიხრები, დაზიანებულია საცავი.

ბოლო 24 საათის განმავლობაში დაგვიკავშირდა უამრავი ადამიანი, როგორც საქართველოდან ასევე საზღვარგარეთიდან , მხარდაჭერის სურვილით, ფიზიკური თუ ფინანსური დახმარების შემოთავაზებით. ყველას ამისთვის გვინდა გადავუხადოთ დიდი მადლობა.

ფინანსური დახმარების მსურველებისთვის ჩვენი ანგარიშის ნომერი არის:

GE34თB7850936080100005 ლარი

GE62თB7850936180100002 UშD

GE62თB7850936180100002 Eურო

თუ გაქვთ სამშენებლო კვალიფიკაცია და გსურთ ფიზიკურად მიიღოთ მონაწილეობა აღდგენის პროცესში მოგვწერეთ მესინჯერში ან ელექტრონულ ფოსტაზე: ლანა.გჰვინჯილია@სპლ.გე

დიდი მადლობა თქვენი მხარდაჭერისთვის!

Pშ. 22 აპრილს, ბიბლიოთეკის დაბადების დღეა, 6 წლის ვხვდებით. ", - წერეია განცხადებაში.

ბიბლიოთეკის განცხადებას გამოეხმაურა მიხეილ სააკაშვილი და "ფეისბუქზე" დაწერა, რომ ინიციატივას მხარს უჭერს:

"მე არასდროს ვყოფილვარ ამ ბიბლიოთეკაში, სამაგიეროდ 150 ათასზე მეტი ადამიანია ნამყოფი და ათასობით სარგებლობს ამ რესურსით. ვუჭერ მხარს ამ ინიციატივას", - წერს მიხეილ სააკაშვილი.

შეგახსენებთ, 19 აპრილს ბიბლიოთეკაში ხანძარი ადრე ნასამართლევმა, სხვადასხვა დროს ოპოზიციურად განწყობილი პარტიებისა და პოლიტიკოსების მიმართ აგრესიით გამორჩეულმა ბესო ქათამაძემ გააჩინა, ვიდეო თავად გადაიღო და "ფეისბუქზე" გაავრცელა. ის მოგვიანებით დააკავეს. ოპოზიცია ამბობს, რომ ბესიკ ქათამაძე სუს-ის დავალებების შემსრულებელია.