პირბადეების სკანდალი და შესაძლო კორუფცია - ოპოზიციის მტკიცებით, კომპანია, რომელმაც დოლბანდი დაამზადა, სუს-ისა და შსს-ს მაღალჩინოსნებთან პირდაპირ კავშირშია

პოლიტიკა - 13:14, 16 Apr, 2020

1170

ოპოზიცია პირბადეების კორუფციულ სქმემას აქვეყნებს, რომელშიც მაღალჩინოსნების გვარები ფიგურირებს.

ოპოზიციის მტკიცებით, კომოპანიის უკან, რომელსაც საქართველოს ხელისუფლებამ (ეკონომიკის სამინისტრომ) დოლბანდის პირბადეების შეკერვა შეუკვეთა, შინაგან საქმეთა და სუს-ის უფროსის მოადგილეები დგანან.

საკრებულოს ოპოზიციონერი დეპუტატი, ლევან ხაბეიშვილი აცხადებს, რომ "ემ ჯი ემტექსის", დამფუძნებლებს სუს-ის უფროსის მოადგილე, ალექსანდრე ხოჯევანიშვილთან და მის ძმასთან, გიორგი ხოჯევანიშვილთან ახლო ურთიერთობა აკავშირებთ.

ერთიანი ნაციონალური მოძრაობის ინფორმაციით, კორუფციულ სქემაში ფიგურირებს შინაგან საქმეთა მინისტრის მოადგილე, კახა საბანაძე.

"საინტერესოა ვინ აკეთებს მილიონებს?! სუს-ის უფროსის მოადგილე ბატონი ალექსანდრე ხოჯევანიშვილი, რომლის ძმა შიდა ქართლის გუბერნატორია, შსს-ს მინისტრის მოადგილე საბანაძე.

დოკუმენტალურად დასტურდება, რომ ამ ბიზნესში ფაქტობრივად ჩართულია სუს-ის უფროსის მოადგილე და შს მინისტრის მოადგილე.

საბოლოო ჯამში საუბარია იმაზე, რომ მაშინ როდესაც ადამიანები ეპიდემიას ებრძვიან, ეს ადამიანები დამატებით მილიონობით ლარის სარგებელს ნახულობენ. ის რომ, ერთ-ერთ გადაცემაში გაკეთებულ განცხადებას, სადაც საუბარი იყო, რომ ჯანდაცვის სამინისტროსთვის ეს კომპანია კერავდა პირბადეებს ხელისუფლების არცერთი წევრი არ გამოეხმაურა.- აცხადებს ხაბეიშვილი "მთავარ არხთან".

აღსანიშნავია, რომ პირბადეების სკანდალის შემდეგ, ეკონომიკის სამინისტრომ კომპანიასთან ხელშეკრულება გააუქმა.

ოპოზიციაში ამბობენ, რომ ხელისუფლება 1.08 ლარად ყიდულობდა პირბადეს, რომელსაც სამედიცინო დანიშნულება არ ჰქონდა და ფული მიდიოდა ძალოვენების ხელმძღვანელ პირებთან, რომლებიც აღნიშნულ კომპანიასთან არიან კავშირში.