საქველმოქმედო აქციებით გამორჩეული ქართველი ექიმი აშშ-ში კორონავირუსით დაინფიცირდა

პოლიტიკა - 08:09, 16 Apr, 2020

1199

აშშ-ში მყოფი ქართველი ექიმი მარინე ძაგნიძე, რომელიც არაერთი საქველმოქმედო აქციის ინიციატორია, კოვიდ-19-ით დაინფიცირდა და ამის შესახებ საზოგადოებას თავად, "ფეისბუქის" მეშვეობით აცნობა.

რიოგორც ირკვევა, მარინე ძაგნიძე, სავარაუდოდ, ინფიცირებულ პაციენტთან კონტაქტის დროს დაინფიცირდა და, როგორც თვითონ ტვ "პირველთან" საუბარში განაცხადა, ეს მოსალოდნელიც იყო, რადგან საწყის ეტაპზე, როცა მას და მედპერსონალის სხვა წევრებს ინფიცირებულებთან კონტაქტი უწევდათ, სამედიცინო ეკიპირება ძალიან მწირი იყო:

"ეს მოსალოდნელიც იყო, რადგან თავიდან სრულიად მოუმზადებელი შევხვდით ვირუსის აფეთებას, არ იყო ეკიპიორება და უბრალო ქირურგიული ნიღაბი გვქონდა, ერთი ცალი მთელი თვის განმავლობაში უნდა გვემყოფინა, სხცვაგვარად არ გამოდიოდა. ჩვენი კონტინგენტი, ძირითადად, ხანდაზმული ადამიანებია, სამწუხაროდ, ლეტალური შედეგიც მაღალია, სავარაუდოდ, ინფიცირებულთან კონტაქტია მიზეზი, ეს ნიღაბი რომ გიკეთია, შუალედებში, როცა პაციენტიდან პაციენტთან გადადიხარ, ხომ იხსნი, რადგან მხურვალეა, გინდა წყალი დალიო, სითხე მიიღო და აი, აქ უშვებ შეცდომას...

ფაქტობრივად, შენ ხედავ, რომ ბაქტერიების ბუდეში ხარ, ბაქტერიები ფუთფუთებენ შენს ირგვლივ, მაგრამ შეუძლებელია, ამ უხილავი მტრისგან, ასეთ პირობებში, სრულად დაიცვა თავი...

ძალიან რთული მდგომარეობაა ჩვენს კლინიკაში: სამედიცინო დირექტორი ინფიცირებულია, ინფიცირებულია მედპერსონალის ძალიან დიდი ნაწილი, პაციენტების 60%, ფაქტობრივად, კლინიკა, შესაძლოა, დაიხუროს", - ამბობს ტვ პირველთან საუბარში მარინე ძაგნიძე.

მისი თქმით, ტესტი მას შემდეგ ჩაიტარა, რაც თავი შეუძლოდ იგრძნო:

"რამდენიმე დღის წინ, როცა საწოლიდან წამოვდექი, სისუსტე ვიგრძენი და იქვე დავეშვი. ჩვენს ორგანიზმს ყველანი ვიცნობთ და მაშინვე მივხვდი, რომ რაღაც ხდებოდა, ტესტი ჩავიტარე და დადებითი პასუხი მოვიდა. თავს ცუდად არ ვგრძნობ, იმედია, ადვილად გადავიტან, ჩემი ქალიშვილი ექიმია, ყველა რეკომენდაციას ვასრულებ, რაც ასეთ შემთხვევებშია გათვალისწინებული", - ამბობს მარინა ძაგნიძე.

შეგახსენებთ, მარინე ძაგნიძის ინიციატივით, ქართველმა ემიგრანტებმა არაერთხელ შეუგროვეს სოლიდური თანხა შვილმოკლულ მამებს ზაზა სარალიძესა და მალხაზ მაჩალიკაშვილს, ასევე დავით ქაცარავასა და მის მეგობრებს, რომლებიც შიდა ქართლის საოკუპაციო ზოლთან 2017 წლის ივლისიდან პატრულირებენ.

მარინე ძაგნიძეს თანადგომა უამრავმა მეგობარმა, ასევე მისთვის უცნობმა ადამიანმა გამოუცხადა. ასევე, დავით ქაცარავამ მის მიერ დაფუძნებული ორგანიზაცია "ძალა ერთობაშიას" და "ატოცელების" სახელით მადლობა გადაუხადა მას და დაწერა, რომ ის აუცილებლად, ხანმოკლე დროში გამოჯანმრთელებული დაუბრუნდება ჩვეულ საქმიანობას, ოჯახსა და მეგობრებს:

"ჩვენი ორგანიზაციის, ჩვენი გუნდის, "ატოცელების" სახელით, სრულ თანადგომას ვუცხადებთ ქალბატონ მარინე ძაგნიძეს, რომელიც დაუღალავად გვედგა და გვიდგას მხარში - მან თავი შეუძლოდ იგრძნო, ტესტი ჩაიტარა და კოვიდ19-ით ინფიცირება დაუდგინდა, თუმცა, როგორც ყოველთვის, ამ დაბრკოლებასაც ღირსებით სავსე შეხვდა.

ქალბატონი მარინე ექიმია და ინფიცირებაც სწორედ იმაზე მიანიშნებს, რომ მას სხვების გადასარჩენად თავი არ დაუზოგავს. ის თავს მხნედ გრძნობს, თვითიზოლაციაშია და ასრულებს ყველა რეკომენდაციას, რაც ამ შემთხვევაშია გათვალისწინებული.

დარწმუნებული ვართ, ქალბატონ მარინეს ვერც ეს ვირუსი მოერევა (რომ ვერ შეაშინა, უკვე ვხედავთ) და სულ ცოტა ხანში სრულად გამოჯანმრთელებული დაუბრუნდება თავის ჩვეულ საქმიანობას, ოჯახსა და მეგობრებს.ქალბატონო მარინე, თქვენს გვერდით გვიგულეთ", - წერს დავით ქაცარავა ოფიციალურ გვერდზე.

მარინე ძაგნიძე, ასევე მოიკითხა და თანადგომა გამოუცხადა მალხაზ მაჩალიკაშვილმა.

"აუცილებლად გამოჯანმრთელდები, მე შენთვის ვილოცებ", - მისწერა მან მარინე ძაგნიძეს.