"თუ ქვეყნის ეკონომიკა ჩამოიქცა ყველანი აღმოვჩნდებით უმძიმეს მდგომარეობაში"- ბურჯანაძე ხელისუფლებისგან სამოქმედო გეგმის წარდგენას ითხოვს

პოლიტიკა - 14:26, 15 Apr, 2020

534

თუ ხელისუფლება სასწრაფოდ არ წარმოადგენს სამოქმედო გეგმას, ქვეყანას უმძიმესი ეკონომიკური კრიზისი ელოდება - ამის შესახებ „ერთიანი საქართველოს“ ლიდერმა ნინო ბურჯანაძემ ჟურნალისტებს განუცხადა.

მისი თქმით, მთავრობამ უნდა შეძლოს კორონავირუსის წინააღმდეგ ბრძოლა და იმ ეკონომიკურ გამოწვევებთან ბრძოლა, რომელსაც ქვეყნისთვის დიდი ზიანის მიყენება შეუძლია.

„გუშინ გიორგი გახარიამ თქვა, რომ ისინი ორ ფრონტზე იბრძოლებენ, მაგრამ ნამდვილად არ ჩანს გეგმა, როგორ იბრძოლებენ ისინი ეკონომიკურ ფრონტზე. ყველას ძალიან კარგად უნდა გვესმოდეს, რომ ამ ორი ფრონტიდან ნებისმიერ ერთ-ერთზე, კორონავირუსის ფრონტზე თუ ეკონომიკურ ფრონტზე დამარცხება, იქნება საერთო დამარცხება ქვეყნის. უნდა გვესმოდეს, რომ თუ ხელისუფლება სასწრაფოდ არ წარმოადგენს სამოქმედო გეგმას, ქვეყანას უმძიმესი ეკონომიკური კრიზისი ელოდება. ჩვენ უკვე ყოველთვიურად ვკარგავთ 2 მილიარდ ლარს, რაც წარმოიდგინეთ ჩვენი ქვეყნისთვის რამდენად დიდი ციფრია. გუშინ კიდევ ერთხელ გამოჩნდა ის, რისი საშიშროებაც ყველაზე მეტად იყო, რომ მთავრობას არ აქვს სამოქმედო გეგმა ჩამოყალიბებული. მთავრობამ ილაპარაკა, რომ ხომ არ ვიმარჩიელებთ ციფრებზეო? ახლა არ უდა მარჩიელობდეთ ციფრებზე, ახლა სტატისტიკის დეპარტამენტს, მთავრობას, ექსპერტებს , ყველას ერთად უნდა ჰქონდეს დადებული კონკრეტული ციფრები, რამდენმა ადამიანმა დაკარგა შემოსავალი, როგორია დანაკარგი. ტყუილია ლაპარაკი იმაზე, რომ ჩვენ საერთაშორისო თანამეგობრობიდან სერიოზულ და ძლიერ დახმარებას მივიღებთ, თუ ხელისუფლებას არ ექნება კონკრეტული ციფრები რა ზარალს განიცდის ქვეყანა.. წარმოუდგენელია ის, რაც ჩვენ გუშინ 150 ლარიან დახმარებასთან დაკავშირებით მოვისმინეთ. პრემიერი გვეუბნება რომ დახმარება ან 150 ლარზე მეტი იქნება, ან 200 ლარი იქნება, ან არ ვიცით რამდენი იქნება. რას ვეუბნებით ხალხს, ადამიანებს, რომელიც სახლშია და შემოსავლის წყარო არ აქვთ? გაურკვევლობა არის ყველაზე ცუდი. თუ ქვეყნის ეკონომიკა ჩამოიქცა და ამის ნიშნები უკვე არის, ჩვენ, ყველანი აღმოვჩნდებით უმძიმეს მდგომარეობაში, არავინ დარჩება მოგებული და ქვეყნის ეკონომიკის წამოწევას წლები დასჭირდება“, - განაცხადა ბურჯანაძემ.