ბაჩუკი ქარდავა: ჩვენ პატიოსანი ხელისუფლება არ გვყავს, ასეთი ხელისუფლებები მზად არიან, დიდი ტრაგედიები საკუთარ ინტერესებს მოარგონ

პოლიტიკა - 20:59, 11 Apr, 2020

1018

საპარლამენტო და არასაპარლამენტო ოპოზიცია საგანგებო მდგომარეობის პირობებში ხელისუფლების ნაბიჯებს კრიტიკულად აფასებს და აცხადებს, რომ ის შერჩევითობის პრინციპით მოქმედებს. მათი თქმით, საგანგებო მდგომარეობისა და კომენდანტის საათის პორობებში ხელისუფლება თავს კომფორტულად გრძნობს.
ედპ-ს ლიდერი ბაჩუკი ქარდავა ამბობს, რომ ისეთი ხელისუფლებები, როგორიც ამ ეტაპზე საქართველოს ჰყავს, მუდამ მზად არიან, დიდი ტრაგედიები საკუთარ ინტერესებს მოარგონ.

"ხელისუფლება თავისი პოლიტიკური ინტერესებისათვის აუცილებლად გამოიყენებს ამ მოცემულობას. იმიტომ, რომ ჩვენ არ გვაქვს საქმე პატიოსან ხელისუფლებასთან. ესეთი ხელისუფლებები ყოველთვის მზად არიან, რომ ისეთი დიდი ტრაგედია და უბედურება, როგორიც არის ვირუსი და ეპიდემია საკუთარ ინტერესებს მოარგოს.", - აცხადებს ბაჩუკი ქარდავა "ფორმულას" ეთერში.

ხელისუფლების გადაწყვეტილებები კრიტიკულად შეაფასა პარტია "ახალი საქართველოს" ლიდერმა გიორგი ვაშაძემაც. მან ხელისუფლება სტრატეგიის არ ქონაში დაადანაშაულა და განაცხადა, რომ საგანგებო მდგომარეობა სტრატეგიული გეგმის გარეშე ნიშნავს ადამიანების შიმშილს
"ყოველი გაგრძელებული დღე საგანგებო მდგომარეობის და კარანტინის, უმიზნოდ, სტრატეგიის, გეგმის გარეშე არის დამატებითი დღე შიმშილის. ხალხს შემოსავალი აღარ აქვს" - აცხადებს გიორგი ვაშაძე.

ფრაქცია "ნაციონალური მოძრაობის" თავმჯდომარემ, რომან გოცირიძემ ხელისუფლება ანტიკრიზისული გეგმის უქონლობის გამო გააკრიტიკა. მისი თქმით, იმ დროს, როცა ასეულ ათასობით ადამიანი ულუკმაპუროდაა დარჩენილი, ხელისუფლებამ აუცილებლად უნდა წარმოადგინოს საგანგებო ღონისძიებათა პაკეტი.

"ამ ხნის განმავლობაში არაფერი გაკეთებულა ჩვენი მოქალაქეების მხარდასაჭერად. როდესაც ასეულ ათასობით ადამიანი არის სახლში გამოკეტილი, ბევრი მათგანი ულუკმაპუროდ დარჩენილი და ვაგრძელებთ საგანგებო მდგომარეობაში ყოფნას, რა თქმა უნდა მთავრობამ უნდა წარმოადგინოს საგანგებო ღონისძიებათა პაკეტი." - განაცხადა რომან გოცირიძემ.

ხელისუფლების გადაწყვეტილებების შერჩევითობაზე გაამახვილა ყურადღება "ევროპული საქართველოს" წევრმა სერგო რატიანმა. მისი თქმით, მაშინ როცა ხელისუფლება აჯარიმებს საგანგებო მდგომარეობის წესების დარღვევის გამო საზოგადოების ერთ ნაწილს, სხვა ჯგუფები ხელშეუხებელი არიან. მისი თქმით, არსებული შეზღუდვები ყველა მოქალაქეზე ერთნაირად არ მოქმედებს.

"არის ბევრი კითხვები და კითხვები ძირითადად არის დაკავშირებული იმასთანამ, რომ ეს შეზღუდვები არის შერჩევითი" - განაცხადა სერგო რატიანმა.