31 წლის განმავლობაში პირველად, 9 აპრილის მემორიალთან მოქალაქეები და პოლიტიკოსები ლიმიტირებულად მივიდნენ

პოლიტიკა - 11:43, 09 Apr, 2020

554

1989 წლის 9 აპრილს რუსეთის იმპერიის მიერ მოწყობილი სასაკლაოდან 31 წლის შემდეგ თბილისში, 9 აპრილის მემორიალთან მოქალაქეები ორი მიზეზის გამო ვერ მივიდნენ: პირველი მიზეზი კორონავირუსს და შემოღებულ რეგულაციებს უკავშირდება, რადგან ტრადიციული შეკრების დრო, (დილის 4 საათი და შემდეგ) კომენდანტის საათს დაემთხვა, ხოლო მეორე მიზეზი თბილისის მერიის მიერ ჯერ კიდევ რამდენიმე თვის წინ შემოღობილი ტერიტორიაა, რის შემდეგაც 9 აპრილის მემორიალი ღობის მიღმა მოექცა.

მოქალაქეები და პოლიტიკოსები ყოფილ მთვარობის სასახლესთან მიდიოდნენ, მაგრამ მემორიალთან სანთლების დანთებას და ყვავილების მიტანას ვერ ახერხებდნენ, ამას გარდა, სოციალური დისტანციის დაცვის აუცილებლობის გამო, ღობეს, რომლის მიღმაც მემორიალია, ლიმიტირებულად, სამ-სამად და ორმეტრიანი დისტანციით უახლოვდებოდნენ.
პოლიტიკოსები და მოქალაქეები, რომელთა შორისაც 9 აპრილის სასაკლაოს უშუალო თვითმხილველები და პროცესის მონაწილეებიც იყვნენ, ამბობენ, რომ მერიას უნდა გაეთვალისწინებინა არსებული გარემოებები და ღობე თუნდაც ერთი დღით უნდა გაეხსნა, რათა მოქალაქეებს მემორიალთან მიახლებისა და 9 აპრილის გმირების ხსოვნისთვის პატივის მიგების საშუალება ჰქონოდათ.
შეგახსენებთ, 9 აპრილის ტრაგედიიდან 31 წლისთავს საქართველოში აშშ-ის საელჩოც გამოეხმაურა და "ფეისბუქზე" განცხადება გაავრცელა.