„კორონავირუსის ფონზე ოქრუაშვილის პროცესები დაჩქარებული რეჟიმით იმართება, აშკარაა, მოსამართლე განაჩენის გამოტანას ჩქარობს“

„კორონავირუსის ფონზე ოქრუაშვილის პროცესები დაჩქარებული რეჟიმით იმართება, აშკარაა, მოსამართლე განაჩენის გამოტანას ჩქარობს“ - გურამ ჩალაგაშვილი

პოლიტიკა - 10:05, 08 Apr, 2020

560

13 აპრილს ირაკლი ოქრუაშვილის სასამართლო პროცესია ჩანიშნული. ქვეყანაში, კორონავირუსის საფრთხიდან გამომდინარე დაწესებულო საგანგებო რეჟიმის პირობებში, როცა პროცესების უმეტესობა გადაიდო, უცნობია, რა მიზანს ემსახურება ოქრუაშვილის პროცესების თითქმის ყოველდღე, დაჩქარებული წესით გამართვა.

„გამარჯვებული საქართველოს“ ერთ-ერთი ლიდერი გურამ ჩალაგაშვილი ფიქრობს, რომ მოსამართლე განაჩენის გამოტანას ჩქარობს, რაც კიდევ ერთხელ ადასტურებს, რომ ოქრუაშვილის საქმეზე პოლიტიკა სასამართლოზე წინ დგას და გადაწყვეტილებაც პოლიტიკური იქნება.

„კორონავირუსის პანდემიის მიზეზით, სასამართლო პროცესების უმრავლესობა გადაიდო. სხვა სურათია ირაკლი ოქრუაშვილის საქმესთან დაკავშირებით. სასამართლო პროცესები თითქმის ყოველდღე, დაჩქარებული რეჟიმით იმართება.

აშკარაა, მოსამართლე განაჩენის გამოტანას ჩქარობს.

ე.წ. პროკურატურა აღარ მოითხოვს დაკითხოს 400-მდე მოწმე, რომელზეც ყოველი სასამართლო პროცესის დროს აცხადებდა.

ოქრუაშვილის პროცესი იმდენად გახმაურებული და თეთრი ძაფით ნაკერია, რომ მისი არსის გარკვევაში დიდი იურიდიული ცოდნა და გამოცდილება საჭირო არ არის.

ფაქტია პროკურატურას მტკიცებულებები არ ჰქონია. რაც ბუნებაში არ იყო, როგორ ექნებათ?

სამაგიეროდ, მტკიცებულებების არარსებობა არ აინტერესებს მოსამართლე ლავრენტი მაღლაკელიძეს და „ზემოდან“ მითითებებით ცდილობს განაჩენის გამოტანას.

ცხადია, რომ ირაკლი ოქრუაშვილის საქმესთან დაკავშირებით პოლიტიკა სასამართლოზე წინ დგას და გადაწყვეტილებაც პოლიტიკური დადგება.

ირაკლი ოქრუაშვილი პოლიტპატიმარია და ამას მტკიცება არ სჭირდება“ - აცხადებს გურამ ჩალაგაშვილი.