დღეს, სოფლის მეურნეობის მინისტრის მოადგილე დავით გალეგაშვილი და პროექტების მართვის სააგენტოს დირექტორი გიორგი ჩხეიძე პროკრედიტ ბანკში ჟურნალ „პროაგროს“ პირველი ნომრის პრეზენტაციას დაესწრნენ.

პროკრედიტ ბანკმა სოფლის მეურნეობის მხარდასაჭერად  კვარტალური აგროჟურნალის გამოცემა დაიწყო. ჟურნალში ყველა ის საინტერესო თემა განიხილება, რაც ფერმერისა და მისი საქმიანობისათვის საინტერესო და სასარგებლოა. ვინაიდან, ერთ-ერთი მნიშვნელოვანი პრობლემა სოფლად ინფორმაციის ნაკლებობაა, ამიტომ, ყოველ ახალ გამოცემაში  მნიშვნელოვანი სიახლეები და ახალი მიღწევები გამოქვეყნდება.

 „მისასალმებელია პროკრედიტ ბანკის ახალი ინიციატივა, რაც აგროჟურნალის გამოცემას გულისხმობს და თავის მხრივ სოფლის მეურნეობის განვითარების მხარდაჭერისთვის  გადადგმული კიდევ ერთი ნაბიჯია. პროკრედიტ ბანკი ერთ-ერთი პირველთაგანია, რომელიც შეღავათიანი აგროკრედიტის პროექტში ჩაერთო. ის ფაქტი, რომ დღეისათვის მას 4000-მდე აგროკლიენტი ჰყავს, ერთმნიშვნელოვნად მეტყველებს იმ ფაქტზე, რომ ბანკისათვის სოფლის მეურნეობა მნიშვნელოვანი მიმართულებაა“,-განაცხადა დავით გალეგაშვილმა.

ჟურნალისთვის სტატიების მომზადებაზე არა მარტო ბანკის წარმომადგენლები, არამედ საქართველოში მოღვაწე გამოცდილი და კვალიფიციური აგროექსპერტებიც იმუშავებენ.

ჟურნალი „პროაგრო“ აგროსექტორის წარმომადგენლებს წინსვლასა და განვითარებაში დაეხმარება.