ოპოზიციის მიმართვა დასავლელ პარტნიორებს - "საქართველოს დახმარება დასჭირდება, ხელისუფლებამ მოშალა ეკონომიკური საფუძვლები და პანდემიის შემდეგ გამოწვევები ძალიან მძიმე იქნება"

პოლიტიკა - 16:40, 03 Apr, 2020

661

23 ოპოზიციური პარტია დახმარებისთვის დასავლელ პარტნიორებს მიმართავს. ხელისუფლების ოპონენტები სპეციალურ მიმართვას ავრცელებენ და მეგობარ ქვეყნებს საქართველოსთვის ფინანსური დახმარების გაწევისკენ მოუწოდებენ.

ხელმომწერი სუბიექტები დარწმუნებულები არიან, რომ ეს ფინანსური დახმარება კორონავირუსით გამოწვეული მძიმე შედეგებისა და ეკონომიკური კრიზისის დასაძლევად გადამწყვეტი მნიშვნელობის იქნება.

ეროვნულ-დემოკრატიული პარტიის ლიდერი, ბაჩუკი ქარდავა ამბობს, რომ საქართველოში, სადაც ხელისუფლებამ ფაქტობრივად მოშალა ეკონომიკური საფუძვლები, პანდემიის შემდეგ გამოწვევები ძალიან სერიოზული იქნება.

"საქართველოს მსგავსი ქვეყნისთვის, სადაც არ არსებობს ეკონომიკა, სადაც ხელისუფლებამ ფაქტობრივად მოშალა ეკონომიკური საფუძვლები და სახელმწიფო ინსტიტუტები, აქ გამოწვევები ძალიან სერიოზული იქნება და არანაკლებ რთულ და მძიმე ვითარებაში აღმოვჩნდებით, ვიდრე ეს შეიძლება იყოს ვირუსიისგან გამოწვეული.

ამდენად, ოპოზიციამ, რომელიც ყოველთვის საკითხებს სახელმწიფოებრივად ეკიდებოდა, საჭიროდ ჩათვალა, მიმართოს საერთაშორისო თანამეგობრობას, იმ დონორებს, რომლებიც პოსტეპიდემიის პირობებში სახელმწიფოების დახმარებით დაკავდებიან, ჩავთვალეთ ჩაგვეყენებინა ისინი საქმის კურსში, რომ საქართველოს ასეთი ტოპის დახმარება დასჭირდება"- აცხადებს ქარდავა.