"ერთიანი საქართველოს“ ახალი ინიციატივა სამსახურის გარეშე დარჩენილ მოქალაქეებისთვის

პოლიტიკა - 11:32, 01 Apr, 2020

840

,,იმ ადამიანებს, ვინც დაკარგა სამსახური, ვისაც დაერღვა შრომითი უფლებები, ვინც დარჩა შემოსავლის გარეშე, მზად ვართ, სრულიად უანგაროდ გავუწიოთ იურიდიული კონსულტაცია და საჭიროების შემთხვევაში, დავიცვათ მათი უფლებები სასამართლოში“. - აცხადებს ,,ერთიანი საქართველოს" პოლიტსაბჭოს წევრი თამარ ზურაშვილი.

განცხადებაში ნათქვმია, რომ პარტიის ახალი ინიციატივა განაპირობა, კორონა ვირუსით გამოწვეულმა ეკონომიკურმა კრიზისმა, რომელმაც სხვა ბევრ პრობლემასთან ერთად, პრობლემები წარმოშვა ადამიანის უფლებების დაცვის კუთხითაც.

როგორც თამარ ზურაშვილი აცხადებს, პარტიის ინიციატივა დაეხმარება იმ ადამიანებს, რომლებიც დარჩნენ სამსახურისა და შემოსავლის გარეშე, ადამიანებს, რომლებსაც იძულებულს ხდიან უსახსრობის მიუხედავად გადაიხადონ კომუნალური გადასახადები, ადამიანებს, რომლებმაც არ იციან როგორ ირჩინონ თავი და არჩინონ ოჯახი, ადამიანებს, რომელებსაც ხელისუფლება სახლში დარჩენისკენ მოუწოდებს, მაგრამ არაფერს თავაზობს ეკონომიკური კრიზისის დასაძლევად.

,,ქვეყანაში არსებული საგანგებო მდგომარეობისა და ახლა უკვე საყოველთაო კარანტინის გამო, დაწესებულებების ნაწილი გადავიდა მუშაობის დისტანციურ რეჟიმზე. თუმცა, მიუხედავად ამისა, ბევრი კომპანია ვერ ახერხებს არსებულ გამოწვევებთან გამკლავებას და ყოველდღიურ რეჟიმში იზრდება უმუშევრად დარჩენილი ადამიანების რიცხვი, დასაქმებულებს ვადაზე ადრე უწყდებათ შრომითი კონრაქტები, მათ უმცირებენ ხელფასს ან/და უშვებენ უხელფასო შვებულებაში, უუქმდებათ ჯანმრთელობის დაზღვევები და სხვა.

ჩვენ, რა თქმა უნდა, გვესმის, რომ ყოველივე ამას აქვს რეალური გამომწვევი მიზეზები, თუმცა მიგვაჩნია, რომ იმ ვითარებაში, როდესაც ყოველდღიურად მძიმდება სოციალური ფონი და ყოველდღიურად იზრდება უმუშევრობის პრობლემა, დასაქმებულები იმსახურებენ სათანადო დაცვას.“ - აცხადებს თამარ ზურაშვილი.

მისივე განცხადებით, ,,ერთიანი საქართველო“, როგორც ყოველთვის კვლავ რჩება ხალხის სამსახურში და აცხადებს მზადყოფნას, სამართლებრივი დახმარება აღმოუჩინოს ყველა იმ ადამიანს, ვინც თვლის, რომ დაირღვა მისი შრომითი უფლებები". - განაცხადა ,,ერთიანი საქართველოს" პოლიტსაბჭოს წევრმა თამარ ზურაშვილმა.