მოდით, შევინარჩუნოთ სიმშვიდე, არ მივაწყდეთ ისევ მაღაზიებს

მოდით, შევინარჩუნოთ სიმშვიდე, არ მივაწყდეთ ისევ მაღაზიებს - მაია ცქიტიშვილი

პოლიტიკა - 19:06, 30 Mar, 2020

568

გავუფრთხილდეთ ერთმანეთის ჯანმრთელობას, სასურსათო მაღაზიების რიგებში ძალიან მაღალია ინფიცირების რისკი - ამის შესახებ ვიცეპრემიერმა მაია ცქიტიშვილმა ჟურნალისტებთან საუბრისას განაცხადა. მან მოსახლეობას თავშეკავებისკენ მოუწოდა, მისივე თქმით, სურსათის დეფიციტის საშიშროება არ არსებობს, რადგან საერთაშორისო და შიდა სატვირთო გადაზიდვებზე შეზღუდვები არ ვრცელდება.

„მადლობა ამ კითხვისთვის. როდესაც ჩვენ ვსაუბრობთ ზომების გამკაცრებაზე, ძალიან ხშირად მაშინვე ვნახულობთ ხოლმე ძალიან აქტიურ გაყიდვებს და შესყიდვებს ჩვენს მაღაზიებში. მინდა, კიდევ ერთხელ მოვუწოდო მოსახლეობას, თქვენ უკვე გქონდათ შესაძლებლობა დარწმუნებულიყავით, რომ სურსათის მომარაგებასთან დაკავშირებით, ისევე როგორც სამედიცინო პროდუქციასთან, სხვა საჭირო და აუცილებელ პროდუქციასთან მიმართებაში, არ გვაქვს არანაირი შეფერხება მომარაგებაში. ეს გაგრძელდება კვლავ. ძალიან დიდი თხოვნით მივმართავ ყველას, რომ შევინარჩუნოთ სიმშვიდე, გვქონდეს მათ შორის ერთგვარი ნდობაც მთავრობის მიმართ, როდესაც თქვენ ხედავთ უკვე და არაერთხელ შეგეძლოთ დარწმუნებულიყავით იმაში, რომ ჩვენი მაღაზიების თაროები არ არის ცარიელი და თუ ცარიელდება, მაშინვე ივსება. მოდით, შევინარჩუნოთ სიმშვიდე, არ მივაწყდეთ ისევ მაღაზიებს და პირველ რიგში, მათ შორის გავუფრთხილდეთ ერთმანეთის ჯანმრთელობასაც, რადგან სასურსათო მაღაზიების რიგებშიც, ძალიან მაღალია ინფიცირების რისკი“, – განაცხადა პირველმა ვიცე-პრემიერმა.