სასჯელაღსრულების სისტემის 780 თანამშრომელი მომდევნო კვირებში ციხეებში იცხოვრებს და ტერიტორიას არ დატოვებს

სასჯელაღსრულების სისტემის 780 თანამშრომელი მომდევნო კვირებში ციხეებში იცხოვრებს და ტერიტორიას არ დატოვებს - თეა წულუკიანი

პოლიტიკა - 18:46, 30 Mar, 2020

633

იუსტიციის მინისტრის, თეა წულუკიანის, თქმით, პენიტენციური დაწესებულებების 780 თანამშრომელი რამდენიმე კვირის განმავლობაში სახლში აღარ დაბრუნდება და საპატიმროების შენობებში იცხოვრებს, რათა მისივე განცხადებით, არცერთ პატიმარს არ ჰქონდეს განცდა, რომ შესაძლოა, რომელიმე თანამშრომელმა ახალი კორონავირუსი გარედან შიგნით შეიტანოს.
თეა წულუკიანმა პატიმრებს მოუწოდა, მოუფრთხილდნენ და პატივი სცენ თანამშრომლებს.
„პატიმრებს მინდა მივმართო და ვთხოვო, რომ ამ 780 თანამშრომელს, რომელმაც ნებით გადაწყვიტა მათთან ერთად საპატიმროში ცხოვრება მომდევნო კვირების განმავლობაში, მოუფრთხილდნენ და პატივი სცენ მათ; თუკი ჩვეულებრივ დროს გვქონდა ჩვენი თანამშრომლების შეურაცხყოფის ფაქტები, მომდევნო კვირებში მაინც თავი შეიკავონ ამ თანამშრომლებისადმი ნებისმიერი ტიპის აგრესიისაგან, რადგან ესენი არიან ის ადამიანები, ვინც სახელმწიფო და საზოგადოებრივი საჭიროებიდან გამომდინარე, დათანხმდა დაწესებულების ტერიტორიაზე არაერთი დღით მუდმივ რეჟიმში ცხოვრებას,“ - განაცხადა წულუკიანმა.