დაავადებათა კონტროლისა ეროვნული ცენტრის დირექტორის მოადგილემ პაატა იმნაძემ მარნეულში საველე ჰოსპიტალთან მოქალაქეების რიგის შესახებ დასმულ კითხვას უპასუხა და აღნიშნა, რომ მისი თანამშრომლები, ძალიან დიდ საქმეს აკეთებენ, რთული სამუშაოს შესრულება უწევთ და მათ არაფრის ეშინიათ.

იმნაძემ მოუწოდა ყველას, რომ აცადონ მათ მუშაობა და არ მოაყენონ შეურაცხყოფა.

მისივე თქმით, მსოფლიოს სხვა ქვეყნებში არათუ მოქალაქეებს, ავადმყოფებსაც კი არ უკეთებენ ტესტებს.

"ნახონ რა ხდება მსოფლიოს სხვა ქვეყნებში. საერთოდ უკეთებენ თუ არა ტესტს ავადმყოფებსაც კი, არათუ ასე მოსახლეობას. ეს ხდება მსოფლიოს უმდიდრეს ქვეყნებში. ჩვენ ყველას, ვინც კი საჭიროა ვუკეთებთ ტესტს და ეს ადამიანები, ჩემი თანამშრომლები, ახალგაზრდა გოგო -ბიჭები, ავადმყოფს პირს აღებინებენ, რომელიც ამ დროს ახველებს მათ სახეში, არ ეშინიათ და მუშაობენ. აცადეთ მათ მუშაობა. მე ყველას გთხოვთ, ეს ჩემი ახალგაზრდა თანამშრომლები, რომლებსაც არაფრის არ ეშინიათ, ვიმეორებ ახველებენ სახეში პაციენტები, აცადეთ. ხახაში უნდა ჩათხარონ ნიმუშის ასახებად ჩხირები, მათ ამ დროს ავადმყოფები სახეში ახველებენ, ეს ბუნებრივი რეაქციაა ადამიანის. აცადეთ ამ ადამიანებს მუშაობა, იმუშაონ ნორმალურად, წყნარად და ნუ მიაყენეთ ამით შეურაცხყოფას. ისინი აუღებენ ყველას ტესტს, ვინც საჭიროა, რომ გამოიკვლიონ," - განაცხადა პაატა იმნაძემ.