თბილისის მერია ისევ აგრძელებს ადრე დაწყებულ პრაქტიკას, რომლის მიხედვითაც დედაქალაქის მცხოვრებლებს გადასახადებზე ვაუჩერები დაერიცხებათ. ამის შესახებ დედაქალაქის მერიის სოციალური მომსახურებისა და კულტურის საქალაქო სამსახურის ხელმღვანელმა, მამუკა ქაცარავამ განუცხადა.

მისი თქმით, თბილისელებს ნოემბერსა და დეკემბერში ელექტრონერგიის, წყლისა და დასუფთავების გადასახადის დასაფარად 20-20 ლარი დაერიცხებათ.

"ენერგომატარებლების ვაუჩერებისთვის წლევანდელ ბიუჯეტში თითოეულ აბონენტზე გამოყოფილი იყო ასი ლარი. ჩვენ ეს თანხა ლოგიკურად გადავანაწილეთ ხუთ თვეზე, როდესაც ელექტროენერგიის მოხმარება განსაკუთრებით მაღალია.

იანვარში, თებერვალსა და მარტში ყველა აბონენტს დაერიცხა 20 ლარი, დამატებით ნოემბერსა და დეკემბერში ყველა აბონენტს, დაერიცხება 20-20 ლარი. მათი რიცხვი 400 000-მდეა. ეს თანხა ნოემბერში აღნიშნული იქნება მათ ქვითრებზე. ეს 20 ლარი ნაწილდება კომუნალური მოხმარების სამ კომპონენტზე - ელექტრონერგიაზე და დასუფთავებაზე - 8.15 ლარი, ხოლო წყალზე 3.15 ლარი", - განაცხადა ქაცარავამ.