„ევროპული საქართველო“ საგანგებო მდგომარეობის გამოცხადებას მხარს უჭერს, თუმცა ხელისუფლებას ორ მთავარ პირობას უყენებს

პოლიტიკა - 15:41, 21 Mar, 2020

1332

„ევროპული საქართველო“ საგანგებო მდგომარეობის გამოცხადებას მხარს უჭერს, თუმცა ხელისუფლებას ორ მთავარ პირობას უყენებს.

როგორც მოძრაობის ლიდერებმა სპეციალურ ბრიფინგზე განაცხადეს, ისინი ერთჯერადად დაარღვევენ პოლიტიკურ ბოიკოტს და საგანგებო მდგომარეობის გამოცხადებისთვის ხმის მისაცემად პარლამენტში მივლენ.

დავით ბაქრაძის განცხადებით, საგანგებო მდგომარეობა მკაფიოდ უნდა აკმაყოფილებდეს ორ კრიტერიუმს.

"პირველ რიგში, ის მკაფიოდ უნდა იყოს ვადაში გაწერილი და მეორე, უნდა იყოს ჩამოთვლილი კონკრეტული ღონისძიებები, რა ფორმით და რა პირობებში ვრცელდება საგანგებო მდგომარეობის შეზღუდვები.

ამ ორი კრიტერიუმის დაკმაყოფილების შემთხვევაში, ჩვენ მზად ვიქნებით, მხარი დავუჭიროთ საგანგებო მდგომარეობის გამოცხადებას და მივცეთ მას ყველა ის ბერკეტი, რომელიც მას სჭირდება,"- თქვა დავით ბაქრაძემ.

გიგა ბოკერიას თქმით, ახალი კორონავირუსის გავრცელების საფრთხის წინაშე პასუხისმგებლობა ყველას ეკისრება და სწორედ ასე უნდა იქცეოდეს პასუხისმგებლიანი ოპოზიცია. მისივე თქმით, ვინაიდან ევროპული საქართველო საპარლამენტო გუნდს წარმოადგენს, ის აუცილებლად მისცემს მთავრობას ამ ინსტრუმენტს, თუმცა ვადის მკაფიოდ გაწერა დოკუმენტში მისი პოლიტიკური გუნდისთვის საკვანძო საკითხია.

"ბატონმა გიორგი გახარიამ ახსენა 1-თვიანი ვადა. ჩვენთვის მნიშვნელოვანია, რომ ეს უნდა ეწეროს დოკუმენტში. საზოგადოებას პარლამენტის მეშვეობით უნდა დარჩეს ბერკეტი ხელში, რომ გონივრული ვადის გასვლის შემდეგ ნახოს, რა გააკეთა ხელისუფლებამ, რისთვის გამოიყენა ეს მდგომარეობა, არის თუ არა გააზრებული ამ საგანგებო მდგომარეობის გაგრძელება,"- განაცხადა გიგა ბოკერიამ.