კორონავირუსი და ეკონომიკური კრიზისი: „მთავრობას ვთავაზობთ 5-პუნქტიან გეგმას, გადაუდებელი მოთხოვნებით“

პოლიტიკა - 21:26, 20 Mar, 2020

1084

დღეს, პოლიტიკური პარტია ,,კანონი და სამართალი’’-ს გენერალურმა მდივანმა ირაკლი ღლონტმა საგანგებო ბრიფინგით მთავრობას და მის მეთაურს ახალი გადაუდებელი მოთხოვნებით მიმართა.

,,თითოეული ჩვენთაგანი ვასრულებთ რეკომენდაციებს, ვრჩებით სახლებში და ვმუშაობთ დისტანციურად, თუმცა პარტიაში შემოგვდის ბევრი შეტყობინება, რომ მოსახლოების მნიშვნელოვანი ნაწილი უკიდურესად მძიმე მდგომარეობაში აღმოჩნდა, ოჯახებს არ გააჩნიათ კვების ელემენტარული შესაძლებლობები და რჩებიან ელექტროენერგიის, ბუნებრივი აირის და ინტერნეტის სერვისის გადახდის უუნაროდ.

ამ ვითარებაში მიგვაჩნია, რომ მთავრობის მიერ სასწრაფოდ უნდა გადაიდგას გონივრული ნაბიჯები და ამ მიზნით ჩვენი პარტია მთავრობას და მის მეთაურს წარმოგიდგენთ 5 პუნქტიან გეგმას:

1. გონივრული ვადით გადავადებულ იქნას ყველა ადმინისტრაციული სახდელის გადახდის ვადა, მათ შორის საპატრულო პოლიციის ჯარიმების გადახდის ვადა;

2. გადავადებულ იქნას ავტოსატრანსპორტო საშუალებათა ტექ. დათვალიერების ვადა და არ დაჯარიმდნენ მფლობელები;

3. გადავადებულ იქნას აღსრულების ეროვნული ბიუროს მიერ გასატარებელი ღონისძიებები, შეჩერებულ იქნას ყველა გამოსახლება;

4. ტურისტული სფეროს მსგავსად ყველა მეწარმე სუბიექტს გადაუვადდეს საგადასახადო ვალდებულებები და არ მოხდეს მათზე საურავების დარიცხვა;

5. ელექტროენერგიის, ბუნებრივი აირის და ინტერნეტ პროვაიდერებთან კონსულტაციის გზით მოხდეს მათთვის საგადასახადო ვალდებულებების დროებით შეჩერება, რაც თავის მხრივ მნიშვნელოვნად (დაახლოებით 35 %) გააიაფებს მომსახურების ტარიფებს ‘’ - განაცხადა ღლონტმა.