ეგეოსის ზღვაში ჩაძირული გემის ეკიპაჟის მეექვსე წევრს – კაპიტანს სამაშველო ჯგუფები ამ დრომდე ეძებენ.

როგორც ქართული მხარე აცხადებს, საბერძნეთთან ინტენსიური კავშირი აქვთ, მაგრამ ბოლო ინფორმაციით, სამაშველო სამუშაოებს, ჯერჯერობით, შედეგი არ მოუტანია.

შეგახსენებთ, რომ „სტელა“ ეგეოსის ზღვაში ჩაიძირა, ეკიპაჟის ექვსი წევრიდან ხუთი გადარჩა. ჯერჯერობით ვერ იპოვეს გემის კაპიტანი. ცნობილია, რომ მან გემის დატოვების ბრძანება გასცა და ამისთვის ორი ნავი ზღვაში ჩაუშვეს. როგორც კაპიტნის მეუღლე ამბობს, მან ეკიპაჟის ყველა წევრის შემდეგ დატოვა გემბანი. 

ის მიმართავს ქართულ და ბერძნულ მხარეებს, გულისყურით მოეკიდონ ამ საკითხს და ყველაფერი გააკეთონ მისი მეუღლის გადასარჩენად.