ვიდეოპორტალებსა და სოციალურ ქსელებში გუშინ საღამოს გავრცელდა შსს–ს შენობასთან ახლოს მომხდარი ჩხუბის კადრები, სადაც ასახულია, როგორ ტოვებენ ინციდენტის მონაწილე ერთი მხარის წარმომადგენლები ჩხუბის შემდეგ შემთხვევის ადგილს შავი ფერის, დაბურულმინებიანი ავტომანქანით.

აღსანიშნავია, რომ საქარე მინების სრული დაბურვა კანონით აკრძალულია, თუმცა, ამის მიუხედავად, ზოგიერთი სახელმწიფო მოხელე და ძალოვანი სტრუქტურის წარმომადგენელი სწორედ ასეთი ავტომანქანებით გადაადგილდებიან.

ინტერნეტმომხმარებლები გამოთქვამენ ეჭვს, რომ კადრებში გამოჩენილი ავტომანქანა, სავარაუდოდ, პოლიციის მაღალჩინოსანს ეკუთვნის, თუმცა, იმის გამო, რომ ვიდეოში არ ჩანს სახელმწიფო ნომერი, მანქანის მფლობელის ვინაობის დადგენა შეუძლებელია. ამ დროისთვის არაა ცნობილი ასევე შსს–ს შენობასთან ახლოს მომხდარი ჩხუბის მიზეზი და გაურკვეველია მონაწილეთა ვინაობა.

"ნიუპოსტის" შენიშვნა: რუბრიკაში "შენი რეპორტაჟი" მკითხველის მიერ გამოქვეყნებული ეს მასალა დაშვებულია გამოსაქვეყნებლად რედაქციის მიერ და ის წარმოადგენს ავტორის პირად მოსაზრებას. ამ და სხვა, რედაქციის მიერ დაშვებულ მასალებში მოყვანილი ფაქტების სიზუსტეზე პასუხისმგებელია ავტორი.