"გარყვნილებას მიცემული კაცობრიობა, რომელმაც ღვთისადმი შიში დაკარგა, ვირუსის შიშის ტყვეობაშია"- "ოცნების" დეპუტატი ლოცვის გაძლიერებისკენ მოგვიწოდებს

პოლიტიკა - 14:57, 17 Mar, 2020

1414

"ქართული ოცნების" წევრი, დეპუტატი ალექსანდრე ერქვანია ზიარების წესის შეცვლას ეწინააღმდეგება. დეპუტატმა საზოგადოებას “უაზრო საუბრების” დასრულებისკენ საჯაროდ მოუწოდა.

მისი თქმით, "მსოფლიოში გავრცელებულმა ვირუსმა დაგვანახა, თუ როგორი უსუსური აღმოჩნდა მეცნიერების და ტექნიკის განვითარებაში მიღწეული წარმატებებით თვითდაჯერებული ადამიანი".

"ამპარტავნების სულით შეპყრობილი კაცობრიობა, რომელმაც ღმერთი უარყო და დაუპირისპირდა, მის მიერ დადგენილი კანონების შეცვლა მოინდომა, მარადიულ ცხოვრებას ამსოფლიური ვნებები და სიამოვნება ამჯობინა, გარინდულია.

მსოფლიო პანიკაშია. დაცარიელებული ქალაქები, ჩაკეტილი საზღვრები, გარყვნილებასა და უზნეობას მიცემული კაცობრიობა, რომელმაც ღვთისადმი შიში და კრძალვა დაკარგა, ვირუსის შიშის ტყვეობაშია, ძრწის და კანკალებს სიკვდილის წინაშე, რაც უღმერთობის და ურწმუნოების შედეგია. უნდა გვახსოვდეს, რომ სამყაროს უფალი განაგებს და მისი ნების გარეშე არაფერი ხდება”,- განაცხადა მმართველი პარტიის წარმომადგენელმა პარლამენტში სიტყვით გამოსვლისას და ხელისუფლებას ლოცვის გაძლიერებისკენ მოუწოდა:

“ყველა უნდა გავერთიანდეთ და ვილოცოთ ჩვენი ქვეყნისა და მსოფლიოს გადარჩებისთვის. განსაკუთრებით ხელისუფლების წარმომადგენლები უნდა სასოებდნენ უფალს და ყოვლაწმინდა ღვთისმშობელს. სამწუხაროდ, ამ განსაცდელის დროსაც ზოგიერთები არ წყვეტენ ანტიეკლესიურ პროპაგანდას. გამოჩნდნენ ისეთებიც, რომლებიც ზიარების წესის შეცვლას მოითხოვენ და მიიჩნევენ, რომ ერთი კოვზით ზიარებამ შეიძლება, ვირუსის გავრცლება გამოიწვიოს, რაც გარდა იმისა, რომ დიდი უგუნურება და ურწმუნოებაა, მორწმუნე ადამიანის შეურაცხყოფაა. ამ საკითხზე უნდა დამთავრდეს შეშფოთებები და უაზრო საუბრები”, -თქვა მან.

ამასთან დეპუტატმა თქვა, რომ მუზეუმებში დაცული ხატები – ანჩისხატი, აწყურის ღვთისმშობელი და სხვა – ეკლესიას უნდა დაუბრუნდეს.