სვეტიცხოველში, საქართველოს უკანასკნელი მეფის ჩამომავალი უფლისწულის გიორგის ნათლობის რიტუალის შემდეგ ბიზნესმენმა ლევან ვასაძემ განაცხადა, რომ ის დღეს ამაყია, რადგან გრძნობს, რომ საფუძველი ჩაეყარა კონსტიტუციური მონარქიის აღდგენას.

„მე დღეს ძალიან ამაყი ვარ და ჩემთვის დიდი პატივია, ვიყო უფლისწულ გიორგის ნათლია. დიდი და მნიშვნელოვანი დღეა, რადგან დღეს საფუძველი ჩაეყარა კონსტიტუციური მონარქიის აღდგენას საქართველოში“, - თქვა ლევან ვასაძემ.

შეგახსენებთ, რომ უფლისწულ გიორგის ნათლობის რიტუალი დღეს სვეტიცხოველში გაიმართა. უფლისწულის ნათლობა სრულიად საქართველოს კათოლიკოს-პატრიარქმა აღასრულა.

უფლისწულს 4 ნათლია ჰყავს - ბიზნესმენი ლევან ვასაძე, მიხეილ ახვლედიანი , და უფლისწულის ბიძები - გურამ და ირაკლი ბაგრატიონები. ისინი უფლისწულის მამის, დავითის ძმები არიან.

დღევანდელ ღონისძიებას ესწრებოდნენ ასევე მთავრობის წარმომადგენლები და საზოგადოებისთვის ცნობილი სახეები. მათ შორის, იქ იმყოფებოდნენ თავდაცვის მინისტრი ირაკლი ალასანია და ფინანსთა მინისტრი ნოდარ ხადური. ნათლობაზე ბიზნესმენი და უფლისწულის ნათლია ლევან ვასაძე მეუღლესთან და შვილებთან ერთად იმყოფებოდა.