"მოგვაწოდა მანქანის ნომერი, რომლითაც გადაადგილდებოდა, მისამართები, სადაც დრო გაატარა"- მინისტრის მადლობა ჩეხ ტურისტს, რომელსაც გუდაურში ვიზიტის შემდეგ კორონავირუსი დაუდასტურდა

პოლიტიკა - 14:08, 16 Mar, 2020

1037

ჯანდაცვის მინისტრი, ეკატერინე ტიკარაძე ადასტურებს ინფორმაციას, ჩეხი ტურისტების დაინფიცირების შესახებ.

როგორც მინისტრმა მთავრობის კანცელარიაში გამართულ სპეციალურ ბრიფინგზე განაცხადა, კორონავირუსის სიმპტომები ტურისტს მას შემდეგ გამოუვლინდა, რაც ჩეხეთში გაემგზავრა.

ტიკარაძის ინფორმაციით, მას შემდეგ, რაც ინფიცირებულ ტურისტს კორონავირუსი დაუდგინდა, ის დაუკავშირდა საქართველოს საელჩოსა და იმ სასტუმროს, სადაც ისვენებდა და აღნიშნული ინფორმაცია მიაწოდა.

"ჩეხი ტურისტის მიერ მიწოდებული ინფორმაცია მნივნელოვნად დაეხმარა ქართულ უწყებებს, რათა ყველა იმ პირის იზორილება მომხდარიყო, ვინც მასთან კონტაქტში იმყოფებოდა. ჩეხ ტურისტს მოწოდებული აქვს ყველა მანქანის ნომერი, რომლითაც ის გადაადგილდებოდა და მისამართები, სადაც მან გარკვეული დრო გაატარა.

მე მინდა მადლობა გადავუხადო ჩეხეთის მოქალაქეს მისი მაღალი სამოქალაქო პასუხისმგებლობისთვის, ვინაიდან მან არ დამალა, დარეკა და ფაქტი დააფიქსირა, ასევე ფოტომასალით სრულიად აღწერა ის მარშრუტი, რაც მან გაიარა სიმპტომების გამოვლენის შემდეგ", — განაცხადა ეკატერინე ტიკარაძემ.

შეგახსენებთ, გუდაურში ერთ-ერთი პოპულარული რესტორანი "მთვრალი ალუბალი" "ფეისბუქზე" განცხადებას ავრცელებს და აღნიშნავს, რომ 4 მარტიდან რესტორანი ექვს ჩეხ ტურისტს მასპინძლოვბდა, საიდანაც სამს კორონავირუსი აღმოაჩნდა, აქედან გამომდინარე, რესტორანი მიმართავს ყველას, ვინც 4 მარტიდან დღემდე რესტორანში ყოფილა - კორონავირუსზე ტესტირება ჩაიტაროს.რესტორანი ამ დროისთვის დაკეტილია, ორი თანამშრომელი მაღალი ტემპერატურით ელოდება კატასტროფის ბრიგადას, ხოლო დანარჩენი თანამშრომლები თვითიზოლაციაში არიან.
როგორც განცხადებაშია აღნიშნული, ამის შესახებ დაავადებათა კონტროლის ცენტრიდან ზარის შემდეგ შეიტყვეს, როცა კორონავირუსით ინფიცირებულმა ტურისტებმა აღნიშნეს, რომ საქართველოში ყოფნის დროს ყოველდღე დადიოდნენ რესტორან "მთვრალ ალუბალში".