რამდენიმე დღის წინ ვებ-გვერდმა georoyal.ge-მ გამოაქვეყნა პატარა გიორგი დავითისა და ანას ძე ბაგრატიონ-ბაგრატიონის ახალი ფოტო.

ფოტოს ახლდა სულ პატარა ტექსტი: „გიორგი დავითისა და ანას ძე ბაგრატიონ-ბაგრატიონის ახალი ფოტო. 27 სექტემბერს იგი 2 წლის გახდება. ღმერთმა კარგ ქართველად და მართლმადიდებლად გაზარდოს...“

მასალა გავრცელდა „ფეისბუკით“, დაიდო სხვადასხვა ჯგუფებში.

თავიდან ეს ფოტო-სურათი „ფეისბუკზე“ გავრცელდა უფლის ხეთუქმნელი კვართისა და საქართველოს არწივის ორდენის საქართველოს რექტორის, სიმონ კოპაძის მიერ.

შეგახსენებთ, რომ სვეტიცხოველში უფლისწული გიორგი დღეს მონათლეს. უფლისწულს 4 ნათლია ჰყავს - ბიზნესმენი ლევან ვასაძე, მიხეილ ახვლედიანი , და უფლისწულის ბიძები - გურამ და ირაკლი ბაგრატიონები. ისინი უფლისწულის მამის, დავითის ძმები არიან.

ნათლობის ცერემონია ჩატარდა სვეტიცხოველში, რომელიც სრულიად საქართველოს პათოკოლიკოს-პატრიარქმა, უწმინდესმა და უნეტარესმა ილია მეორემ აღასრულა. 
სვეტიცხოველში საღმრთო ლიტურგია დილიდან მიმდინარეობდა, რომელიც ილია მეორემ მღვდელმთავრებთან და სასულიერო პირებთან ერთად აღავლინა.

დღევანდელ ღონისძიებას ესწრებოდნენ ასევე მთავრობის წარმომადგენლები და საზოგადოებისთვის ცნობილი სახეები. მათ შორის, იქ იმყოფებოდნენ თავდაცვის მინისტრი ირაკლი ალასანია და ფინანსთა მინისტრი ნოდარ ხადური. ნათლობაზე ბიზნესმენი და უფლისწულის ნათლია ლევან ვასაძე მეუღლესთან და შვილებთან ერთად იმყოფებოდა.

ქართველი უფლისწულის ფოტოების გამოქვეყნებას „ფეისბუქზე“ უამრავი მოწონება, გაზიარება და კომენტარი მოჰყვა.

ვებ-გვერდი georoyal.ge რამდენიმე კომენტარს ავტორთა მითითებით აქვეყნებს:

Rezo Takidze : „უფალი ჰფარავდეს პატარა უფლისწულს! სამშობლოს იმედად გაიზარდე პატარა მამულიშვილო.“

George Oniani: “გელოდებით მეფეო... მალე გაიზარდე... შენი იმედი აქვს საქართველოს“.

ნინო ჩიქოვანი: ღმერთმა კარგ ქართველად გაზარდოს, შეუცნობელია ღვთის განგებულება,ინებოს უფალმა საქართველოს სამეფოს აღდგინება და გაბრწყინება!

Andro Mgeladze: „მეფური აღზრდა უნდა ამ პატარას და შემდეგ კურთხევა მეფედ“.

Zviadi Shermadini: „მომავალი მეფე... დიახაც აუცილებლად აღდგება, უბრალოდ დროა ცოტა საჭირო ისეთი თვალდაბრმავებული ქართველობისთვის, რომ მეფობა არის უფლისგან და ბაგრატიონები იყვნენ, არიან და იქნებიან ვიდრე მეორედ მოსვლამდე საქართველოს მეფეები და დედოფლები ზოგიერთების გულის გასახეთქად“...

Magda Liaparteliani: „ქართველი უფლისწული! საყვარელი! გაიზარდოს სასახელო და ბედნიერი, გაიხარე და გამრავლდი! მე ამის ლამაზ ბებიაზე ვგიჟდები...

Tsitsi Khutsishvili: ღმერთი იყოს ამ პატარა ანგელოზის მფარველი!“