იტალიის ექსპრემიერი სილვიო ბერლუსკონი, იტალიური მედიის ცნობით, გასაიდუმლოებულ ვითარებაში დაქორწინდა ფრანჩესკა პასკალეზე.

77 წლის ბერლუსკონისა და 28 წლის ფრანჩესკა პასკალეს ქორწინების დეტალების აღწერისას იტალიური ყვითელი პრესა წერს, რომ წყვილმა გადაწყვიტა, მხოლოდ ეკლესიაში გაეფორმებინა თავისი ქორწინება, რადგან ბერლუსკონი ოფიციალურად ჯერაც არ გაცილებია თავის მეორე ცოლს.

ქორწინების რიტუალი მილანის გარეუბანში გაიმართა. წყვილმა ერთმანეთი ჯერ კიდევ იმ დროს გაიცნო, როცა ფრანჩესკა მოზარდი იყო და ბერლუსკონის პარტიის „წინ, იტალია!“ ახალგაზრდულ ორგანიზაციაში მუშაობდა.

ფრანჩესკა პასკალე „მის ნეაპოლის“ ტიტულის მფლობელია, შემდეგ ტელევიზიაში მუშაობდა. მოგვიანებით ის ბერლუსკონის მრჩეველი გახდა და დააფუძნა პოლიტიკური მოძრაობა „სილვიო, გვენატრები“. ფრანჩესკა ერთერთ ინტერვიუში ამბობს, რომ სილვიო ბერლუსკონი პირველი დანახვისთანავე შეუყვარდა.