თბილისის მერიის საზოგადოებასთან ურთიერთობის სამსახურის ხელმძღვანელი მანანა თოქმაჯიშვილი "ფეისბუქის" სტატუსით ეხმიანება სხვადასხვა გზებით, ძირითადად, სოციალურ ქსელებში გავრცელებულ ცრუ ინფორმაციას იმის თაობაზე, თითქოს დღეს, 23.00-დან 05:00-დე თბილისში ვერტმფრენებით ჰაერის შეწამლვა იგეგმება.

ინფორმაცია ცოტა ხნის წინ, ვირუსულად გავრცელდა. მასში მოსახლეობას მოუწოდებენ, რომ დროის იმ მონაკვეთში, რომელიც ინფოშია მითითებული, არც გარეთ გავიდნენ და არც სარეცხი გაფინონ, გაფენილი კი ჩამოხსნან.

"მეგობრებო, არც ჩვენ და არც ჩვენს ქალაქს და არც თქვენს სარეცხს არაფერი ემუქრება. დავიცვათ ყველა რეკომენდაცია, რასაც სპეციალისტები გვაწვდიან და პანიკის გარეშე, მშვიდად გადავატაროთ ეს რთული დღეები.

რაც შეეხება ვერტმფრენით დეზინფექციის ჩატარების შესახებ გავრცელებულ ინფორმაციას, რომელიც ვირუსულად ვრცელდება სოცქსელებში, რასაკვირველია, არის ტყუილი და ჩემი აზრით, ძალიან ცუდ დროს შერჩეული უკბილო ხუმრობა (იმედი მაქვს ბოროტი განზრახვა არ ჰქონია ავტორს).

აქვე ინფორმაციისთვის გეტყვით, რომ თბილისის მერია ყოველდღიურ რეჟიმში ატარებს დეზინფექციას ავტობუსებში, მეტროსადგურებში, მეტროს ვაგონებში, სერვისცენტრებში, უფასო სასადილოებში და ასე შემდეგ...სრულდება ყველა მითითება და რეკომენდაცია, რასაც საკოორდინაციო საბჭო გასცემს.

მშვიდობიან ღამეს და ჯანმრთელობას გისურვებთ ყველას!"