საქართველოში, ოკუპირებული ტერიტორიების ჩათვლით, უამრავი ხანძრის კერა იყო, სალხინოში კი სასაფლაო გადაიწვა

პოლიტიკა - 23:56, 10 Mar, 2020

634

საქართველოს მთელ ტერიტორიაზე, ოკუპირებული ტერიტორიების ჩათვლით, უამრავი ხანძრის კერაა. ამ დროისთვის არსებული ინფორმაციით, დღის მანძილზე ხანძრები მძვინვარებდა ოკუპირებულ აფხაზეთში, სადაც ბოლო სამი დღის განმავლობაში სამაშველო სამსაზხურები ხანძრის კერების ადგილას 59-ჯერ გავიდნენ. აფხაზური მედიის ინფორმაციით, ხანძრის კერებია კოდორის ხეობაშიც, თუმცა, დასახლებულ პუნქტებს საშიშროება არ ემუქრება.

ხანძრის კერებია წალენჯიხის მთის ფერდობზეც, იწვის მონაკვეთი ჯვარი-მესტიის გზის გასწვრივაც, რამაც მოსახლეობაში პანიკა გამოიწვია. მარტვილის რაიონის სოფელ სალხინოში ხანძარმა, ფაქტობრივად გაანადგურა სასაფლაო - სოციალურ ქსელში ფოტო ტვ პირველი არხის სამეგრელოს ბიუროს ხელმძღვანელმა ნატო ბერულავამ გამოაქვეყნა.
ხანძარი იყო ასევე გომბორზე, თიანეთთან, იმერეთში, დედელაურში ხოლო გურიაში სოფელ ვაკიჯვარში. ასევე, ანტიოკუპაციური მოძრაობა "ძალა ერთობაშიას" სამოქალაქო საპატრულო ჯგუფმა დღეს გადაიღო ხანძრის კერა ოკუპირებულ შიდა ქართლში, ბერშუეთთან.
ამ დროისთვის ხანძრის კერები საქართველოს ტერიტორიაზე, ოკუპირებული ტერიტორიების გამოკლებით, სრულად ლიკვიდირებულია. დღის მაძილზე ტყის ხანძრებზე მობილიზებული იყო 1500 მეხანძრე-მაშველი, ათეულობით სახანძრო-სამაშველო სპეცტექნიკა. სასაზღვრო პოლიციის სამი ვერტმფრენი, რომლებიც გურიასა და რაჭაში მუშაობდნენ. მათ ჯამში 200-მდე გაფრენა განახორციელეს.