საქართველოს 200-ვე მოქალაქეს, რომელიც რომი-თბილისის სპეციალური რეისით სამშობლოში დღეს დაბრუნდება, კარანტინში გადაიყვანენ. აღსანიშნავია, რომ ბორტზე მყოფი საქართველოს მოქალაქეებიდან ნაწილი იტალიის იმ წითელი ზონიდან არის, სადაც კორონავირუსის გავრცელების საფრთხე მაღალი იყო.

რისკის არსებობის გამო, ბორტზე სანიტარული ზომები მკაცრად იქნება დაცული, რათა არ მოხდეს მგზავრების დაინფიცირება.

„ნიუპსტისთვის“ მოწოდებული ინფორმაციით, ბორტზე რამდენიმე ქართველმა სტუდენტმაც მოახერხა შესვლა.

მათი თქმით, სპეცრეისზე მოხვედრა რექტორის დახმარებით შეძლეს. ისინი ამბობენ, რომ წითელ ზონაში ცხოვრობდნენ და აუცილებელი იყო იტალია დაეტოვებინათ.

„ყოველ წამს მოდიოდა სასწრაფო, ისეთ ადგილას ვიყავით, სადაც უკვე რთული სიტუაცია იყო. გვითხრეს, რომ ბორტზე იქნება დაცული უსაფრთხოების ზომები,"-ამბობს სტუდენტი საქართველოდან.

იტალიაში კიდევ ასობით საქართველოს მოქალაქე რჩება. ისინი სამშობლოში დაბრუნებაში დახმარებას ითხოვენ და იმედოვნებენ, რომ მათი ევაკუაციაც უახლოეს პერიოდში განხორციელდება.