ნიკა მელიას საქმე ბანკ "ქართუს" ეპიზოდზე - ადვოკატი სრულიად გამამართლებელ განაჩენს ითხოვს

პოლიტიკა - 10:08, 10 Mar, 2020

664

ქალაქის სააპელაციო სასამართლო დღეს 12 საათზე დაიწყებს ენმ-ს პოლიტსაბჭოს თავმჯდომარის, პარლამენტარ ნიკა მელიას საქმის განხილვას, რომელიც ბანკ "ქართუს" უკავშირდება. ადვოკატი აცხადებს, რომ ნიკა მელიას არანაირი შეხება გაკოტრების საქმესთან არ ჰქონია და რომ ბრალდებას არც იმის დამამტკიცებელი ფაქტები აქვს, თითქოს ნიკა მელია ორგანიზხებულ ჯგუფს ეხმარებოდა.

"ის, რომ რაიმე კავშირი ჰქონოდა "ქართუ ბანკის" გაკოტრების საქმესთან და ორგანიზებულ ჯგუფს დახმარებოდა, ამის დამადასტურებელი მტკიცებულება ბრალდების მხარეს არ აქვს. შესაბამისად, პირველმა ინსტანციამ ამ ნაწილში ნიკა მელია გაამართლა, რაც სრულიად სამართლიანი გადაწყვეტილებაა. უბრალოდ გაუგებარია რაში გაამტყუნა იმ მხრივ, რომ პროკურატურა მხოლოდ ამ საკითხს ედავებოდა და უბრალოდ სასამართლომ მისცა თავისი ინტერპრეტაცია ნიკა მელიას ქმედებას. საერთოდ სხვა ქმედებაში გაამტყუნა. ჩვენი მოთხოვნა სრულად გამამართლებელი განაჩენის დადგენაა," - აღნიშნა ნიკა მელიას ადვოკატმა გიორგი მდინარაძემ.
2 დეკემბერს საქალაქო სასამართლომ ნიკა მელია აღსრულების ეროვნული ბიუროს ხელმძღვანელად ყოფნის პერიოდში, სამსახურებრივი უფლებამოსილების ბოროტად გამოყენებაში დამნაშავედ ცნო და 25 ათასი ლარის ჯარიმა დააკისრა.
ჯარიმის გარდა, ნიკა მელიას 2 წლის და 3 თვის ვადით ჩამოერთვა თანამდებობის დაკავების უფლება, რის შემდეგაც მას საპარლამენტო უმრავლესობის წევრებმა დეპუტატის უფლებამოსილება შეუჩერეს.