"Милиция", "Скорая помощь" - "ძალა ერთობაშიას" წევრის მოთხოვნით, რუსულწარწერიან მანქანებს "კარფური" გაყიდვიდან ამოიღებს

პოლიტიკა - 12:42, 09 Mar, 2020

1670

სუპერმარკეტების ქსელი "კარფური" ჩინური წარმოების რუსულწარწერებიან სათამაშო მანქანებს ჰყიდის. სათამაშო მანქანები, ფაქტობრივად, ყველა ფილიალში იყიდება.
ანტიოკუპაციური მოძრაობა "ძალა ერთობაშიას" წევრი ნინი გერმანიშვილი შემომტან კომპანიას დაუკავშირდა. კომპანია "ამკოში" მას განუცხადეს, რომ ჩინური წარმოების სათამაშოების შეძენისას წარწერები არ შეუმჩნევიათ, თუმცა თანახმა არიან, "კარფურის" ფილიალებიდან ისინი ამოიღონ, მოგვიანებით კი კომპანია მათ უწარწერო მანქანებით ჩაანაცვლებს.
ნინი გერმანიშვილი "ფეისბუქზე" წერს, რომ საბურთალოს მესამე მ.რაიონის "კარფურში" ეს სათამაშოები არ გაიყიდება. სამოქალაქო აქტივისტი საზოგადოებას მოუწოდებს, რომელ ფილიალშიც არ უნდა მოხვდნენ, მიმართონ "კარფურის" მენეჯერებს სათამაშოების ამოღების მოთხოვნით და უთხრან მათ, რომ კომპანია "ამკოს" ნებართვა და თანხმობა აქვთ:
"ვინც მოხვდებით მთელი თბილისის მასშტაბით არსებულ კარფურებში გთხოვთ მოითხოვოთ ამ მანქანების გადაგდება და ჩააყენოთ კარფურის მენეჯერები საქმის კურსში რომ "ამკოს" წარმომადგენლის ნებართვა გვაქვს", - წერს ნინი გერმანიშვილი.
შეგახსენებთ, ანტიოკუპაციური მოძრაობა "ძალა ერთობაშია" დავით ქაცარავამ 2017 წელს დააფუძნა და მას შემდეგ გუნდის წევრები ყოველდღიურ, უწყვეტ რეჟიმში ატარებენ სამოქალაქო პატრულირებას შიდა ქართლის საოკუპაციო ზოლზე.