აშშ-ის ელჩი საქართველოში კელი დეგნანი რადიო თავისუფლებასთან ინტერვიუში, კორონავირუსზე საუბრობს.

იგი აცხადებს, რომ NCDC ძალიან პროფესიონალურად მუშაობს ლუგარის ცენტრთან ერთად.

"ეს არის კვლევითი ლაბორატორია, რომელიც მრავალი წელია, მუშაობს აქ საზოგადოებრივი ჯანმრთელობის კვლევაზე. ამ თანამშრომლობის ფასი ახლა აშკარად სახეზეა, როცა ჩვენ კორონავირუსის საფრთხის წინაშე ვდგავართ. კიდევ ერთხელ ვიტყვი, რომ საქართველო თავისი რეაგირებით არის ლიდერი და ვფიქრობ, ქართველები ძალიან ამაყები უნდა იყვნენ იმ ფაქტით, რომ NCDC ლუგარის ლაბორატორიასთან ერთად აღმოჩნდა წარმატებული იმაში, რომ საზოგადოებრივი ჯანმრთელობა არის მთავარი პრიორიტეტი. ეს ძალიან შთამბეჭდავია ჩემთვის.

ვფიქრობ, ქართველები საკმარისად ჭკვიანები არიან რუსული დეზინფორმაციის ტაქტიკასთან მიმართებით, რომ განჭვრიტონ უაზრობა, რომელიც ვრცელდება ლუგარის ლაბორატორიაზე. ეს ძალიან სასაცილოა. საზოგადოებრივი ჯანმრთელობის კვლევა აჩვენებს თავის ფასს სწორედ ახლა, გლობალური კრიზისის ფონზე" -განაცხადა კელი დეგნანმა.