აშშ-ს ელჩმა, კელი დეგნანმა ამერიკის ხმასთან ინტერვიუში, ევროსაბჭოს მინისტერიალზე ისაუბრა.

დეგნანმა აღნიშნა, რომ რომ ვერ წარმოუდგენია, როგორ უნდა მიეცა საქართველოს ხელისუფლებას უფლება ჩამოსულიყო ისეთი პირი, რომელსაც კანონები ჰქონდა დარღვეული.

"რუსეთი არ აპირებდა მკაფიოდ ეთქვა, ვის გამოგზავნას აპირებდა დელეგაციის ხელმძღვანელად. ვერ წარმომიდგენია, როგორ უნდა მიეცა საქართველოს ხელისუფლებას საქართველოში შემოსვლის ნება პირისთვის, ვინც არაერთხელ დაარღვია კანონები და სრულად უგულებელყო ისინი აფხაზეთში ჩასვლით. ეს საქართველოს აყენებს პოზიციაში, როცა არ წარმომიდგენია, როგორ შეეძლოთ ამის დაშვება", - განაცხადა ელჩმა.

ცნობისთვის, ევროპის საბჭოს მინისტერიალი 14-15 მაისს უნდა გაიმართოს. აღნიშნული ღონისძიებისთვის საქართველოს, როგორც ევროპის საბჭოს მინისტრთა კომიტეტის თავმჯდომარე ქვეყანას, თბილისში უნდა ემასპინძლა. თუმცა 26 თებერვალს ნობილი გახდა, რომ მინისტერიალი თბილისის ნაცვლად სტრასბურგში ჩატარდებოდა.

ამის მიზეზი გახლდათ ის, რომ ქვეყანაში შესაძლოა რუსეთის დელეგაციის ისეთი წევრები ჩამოსულიყვნენ, რომელთაც ოკუპირებული ტერიტორიების შესახებ კანონი აქვთ დარღვეული, მათ შორის შესაძლოა იყოს რუსეთის საგარეო საქმეთა მინისტრი.