ევროპის სახალხო პარტიის (EPP) ვიცე-პრეზიდენტი, ზიგფრიდ მურეშანი "ფორმულასთან" აცხადებს, რომ თუ საქართველოში მოვლენები ნეგატიურად განვითარდება, ევროპარლამენტში სანქციების საკითხი იქნება განხილული.

ევროპარლამენტარის თქმით, საქართველოს ხელისუფლებამ უნდა იცოდეს, რომ ევროპარლამენტი ყველაფრის საქმის კურსშია, რაც საქართველოში ხდება:

"EPP-ის პოზიცია ნათელია, ჩვენ გვინდა მჭიდრო კავშირები საქართველოსთან, მაგრამ თუ პროგრესს მთავრობაში მყოფი პოლიტიკოსების გამო საფრთხე დაემუქრება, რა თქმა უნდა ამას შედეგებიც მოჰყვება. ზუსტად ვიცით, როდის არ ასრულებენ იმას, რაც ჩვენთან შეათანხმეს. როდის არ ფუნქციონირებს კანონის უზენაესობა, როდის ხორციელდება ზეწოლა მოსამართლეებზე და როდის არ არის სასამართლო დამოუკიდებელი. ეს ყველაფერი რეზოლუციის ნაწილია. რეზოლუციის გზავნილი კი ასეთია, რომ ჩვენ გვინდა მჭიდრო კავშირი საქართველოსთან, მაგრამ ველით მთავრობის მხრიდან დაპირებების შესრულებას".

ამასთანავე, მურეშანი გიგი უგულავას საქმესაც შეეხო და აღნიშნა, რომ ოპოზიციური პოლიტიკოსების დევნა და დაპატიმრება ნორმალური არაა.