საქართველოს პარლამენტის თავჯდომარე არჩილ თალაკვაძე გამოეხმაურა კორონავირუსთან დაკავშირებით საქართველოში არსებულ ვითარებას. მისივე განცხადებით, ამ დროისათვის ქვეყანში პანიკის საფუძველია არ არსებობს, შექმნილი პანიკა კი მხოლოდ ხელს შეუშლის სამედიცინო ღონისძიებების გატარებას.

„ვფიქრობ, პანიკის საფუძველი არ არის - რეალურად, პანიკა ხელს უშლის ღონისძიებების ეფექტურად განხორციელებას, ამიტომ, ამის ნაცვლად, საჭიროა, თითოეულმა მოქალაქემ გავითვალისწინოთ ის რეკომენდაციები, რომელიც ჯანდაცვის მსოფლიო ორგანიზაციამ და ჩვენმა სამსახურებმა მოგვცეს"- თალაკვაძე

არჩილ თალაკვაძის თქმით მსოფლიოს მასშტაბით საქართველო ერთ-ერთი წარმატებული ქვეყანაა კორონავირუსის წინააღმდეგ ბრძოლაში. მან ასევე მადლობა გადაუხადა საქართველოს მთავრობას, ჯანდაცვის სამინისტროს, დაავადებათა კონტროლის ეროვნულ ცენტრს, სამედიცინო პერსონალს, მესაზღვრეებს, საბაჟოს თანამშრომლებს და სხვა პირებს, რომლებიც აქტიურად არიან ჩართულნი კორონავირუსის წინააღმდეგ ღონისძიებებში.

„აუცილებელი პირობების დაცვა, რომელიც უკავშირდება ყოველდღიურ წესებს - იქნება ეს დეზინფექცია, თვითიზოლაცია თუ კონტაქტების შეზღუდვა და გავრცელების წინააღმდეგ გაცემული რეკომენდაციები, რომელსაც ამირან გამყრელიძე და მისი კოლეგები ყოველდღიურ რეჟიმში აცნობენ საზოგადოებას.

ასევე მნიშვნელოვანია, რომ გავუფრთხილდეთ ჩვენი საზოგადოების ხანდაზმულ წევრებს და განსაკუთრებით, გავუფრთხილდეთ იმ ადამიანებს, ვისაც აქვთ ქრონიკული დაავადებები. რისკ-ჯგუფები არის იდენტიფიცირებული და ვფიქრობ, ამ ყველა პირობის და რეკომენდაციის დაცვის შემთხვევაში, ჩვენი ქვეყანა და მსოფლიოც შეძლებს, რომ ეპიდემიასთან დაკავშირებული გამოწვევები რაც შეიძლება, ნაკლები ზიანით და ნაკლები დანაკარგებით გადალახოს",- განაცხადა არჩილ თალაკვაძემ. ​