ივანიშვილის გუნდი საარჩევნო სისტემასთან დაკავშირებით დათმობაზე მიდის: "ხუთით მეტი მანდატი იქნება თუ ხუთით ნაკლები, ეს არ არის მთავარი და პრინციპული“

პოლიტიკა - 12:16, 06 Mar, 2020

1289

"ხუთით მეტი მანდატი იქნება თუ ხუთით ნაკლები პროპორციულ ნაწილში, ჩვენთვის ეს არ არის მთავარი და პრინციპული“- პარლამენტის თავმჯდომარის, არჩილ თალაკვაძის მიერ დღეს გაკეთებულმა ამ განცხადებამ დატოვა შთაბეჭდილება, რომ ივანიშვილის გუნდი საარჩევნო სისტემასთან დაკავშირებით დათმობაზე მიდის.

„ქართული ოცნების“ ერთ-ერთმა ლიდერმა საგანგებო განცხადებისას აღნიშნა, რომ 110/40 - ზე მანდატების გადანაწილება არ არის უპირობო.

თალაკვაძე ამბობს, რომ წინ პოლიტიკურად მძიმე შაბათ-კვირაა და ყველაფერი სავარადოდ ორშაბათს დასრულდება, რადგან სწორედ სამ დღეში იხურება საარჩევნო სისტემაზე მოლაპარაკებების ფანჯარა.

აღსანიშნვია, რომ საგანგებო განცხადებისას პარლამენტის სპიკერმა თქვა, რომ „ობიექტურად არსებობს შესაძლებლობა, რომ პოლიტიკურ პარტიებს შორის საარჩევნო სისტემაზე შეთანხმება მოხდეს“.

„ჩვენ შევძლებთ კდევ ერთხელ შევიკრიბოთ და ვცადოთ შეთანხმების მიღწევა. ობიექტურად, ეს არის შესაძლებელი, ვინაიდან ხელისუფლების მხრიდან ყველა იმ მთავარ საკითხზე, რომელიც ოპოზიციის მხრიდან იყო დაყენებული, არსებობს შემხვედრი და სამართლიანი პოზიციები და წინადადებები.

რაც შეეხება პროპორციების განაწილებას, 40%-იან პრინციპს, თუ სხვა საკითხებს, მინდა ცალსახად გითხრათ, რომ ჩვენი პოლიტიკური ნება, ჩვენი გუნდის პოლიტიკური პოზიცია, ხელისუფლების პოზიცია არის, რომ ქვეყანა მზად არის, გონივრული ნაბიჯები გადადგას პროპორციული არჩევნებისკენ, რომელიც 2024 წელს უნდა ჩატარდეს. მზად ვართ, 2020 წლის არჩევნებისთვის განვიხილოთ, ისეთი პირობები მივიღოთ და კანონმდებლობაში ავსახოთ, რომელიც ჩაჯდება იმ ლოგიკასა და ტრაექტორიაში, რაც 2024 წელს სრულად პროპორციულ არჩევნებზე გადასვლას ემსახურება. შესაბამისად, ამ ლოგიკის ფარგლებში, ყველა სამართლიან და გონივრულ წინადადებას ჩვენი მხრიდან მხარდაჭერა ექნება.

მესმის, რომ ზოგიერთი ოპოზიციური პარტია საუბრობს ხუთით მეტ თუ ნაკლებ მანდატზე. მიგვაჩნია, რომ მაშინ, როცა დაცულია მთავარი პრინციპები, მანდატების რაოდენობა მეორე ხარისხოვანი ხდება. შესაბამისად, ხუთით მეტი მანდატი იქნება თუ ხუთით ნაკლები პროპორციულ ნაწილში, ჩვენთვის ეს არ არის მთავარი და პრინციპული“- აცხადებს თალაკვაძე.

რაც შეეხება 40%იან ზღვარს, თალაკვაძემ თქვა, რომ აქაც ხელისუფლებამ ოპოზიციასთან შემხვედრი ნაბიჯი გადადგა.

"ოპოზიციის მთავარი და მნიშვნელოვანი მოთხოვნა რაც იყო 40%-იან ზღვართან დაკავშირებით, სადაც მათ თქვეს, რომ თუ პოლიტიკური პარტია ვერ აიღებს 40%-ს და მეტს, არ უნდა ჰქონდეს საშუალება დააკომპლექტოს უმრავლსეობა და შექმნას მთავრობა. რა თქმა უნდა, ჩვენ ამაზე შემხვედრი ნაბიჯით ვუპასუხეთ. პირიქით, ჩვენთვის ეს არის პრინციპული, არასდროს გვიფიქრია რომ ხელისუფლება 40%-ზე ნაკლები მხარდაჭერის პარტიამ დააკომპლექტოს.

თუ მათ სურთ რომ ეს პრინციპი, პირდაპირ ასე იყოს ახახული, ჩვენ ამაზე მზადყოფნა და შეთავაზება უკვე გავაკეთეთ. თუ მათ სურთ რომ ეს პრინციპი სხვანაირად იყოს ასახული, შემდეგ მოლაპარაკებებში მზად ვართ რომ ეს საკითხი განვიხილოთ“- განაცხადა თალაკვაძემ.