დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი, ამირან გამყრელიძე აცხადებს, რომ ვირუსის გავრცელების ერთ-ერთი წყარო არის ფული. აღნიშნულ საკითხთან დაკავშირებით გამყრელიძემ მოსახლეობას დამატებითი რეკომენდაციები გააცნო.

გამყრელიძემ განაცხადა, რომ უმჯობესია, თუ ე.წ. ქეშ ფულს მოქალაქეები არ გამოიყენებენ.

გამყრელიძის განმარტებით, ჩინეთი მთლიანად გადავიდა ვირტუალურ ვალუტაზე და იქ ყველა ანგარიშსწორება ელექტრონულად ხდება.

„ერთ-ერთი წყარო გავრცელებისა გახლავთ ფული, ბანკნოტები. მინდა დღეს მოვუწოდო ბანკებს, განსაკუთრებით იმ ბანკებს, ვინც არიგებენ ე.წ ქეშით პენსიებს, ზოგადად მოსახლეობას, შესაძლოა ჩვენთვის ნაკლებად დამაზიანებელია, რადგან შიდა გავრცელება არ გვაქვს და ამ მეთოდებს იყენებდა ჩინეთი, მაგრამ რაც ადრე გამოვიყენებთ ამ ტიპის პრევენციულ ღონისძიებებს, მით უფრო დავიცავთ თავს. ჩინეთი ამ პერიოდში მთლიანად გადავიდა ვირტუალურ ვალუტაზე, ანუ ყველა ანგარიშსწორება იქ ხდება ელექტრონულად. ჩვენთანაც უნდა ვეცადოთ, რომ მაქსიმალურად ანგარიშსწორებები იყოს ელექტრონული, მაგრამ იქ, სადაც აუცილებელია ქეშით, სასურველია ქეშის ხმარების დროს, შემდეგ მაქსიმალურად დავიმუშავოთ ხელები“ ,- განაცხადა ამირან გამყრელიძემ.