აჭარის ტელევიზიის საინფორმაციო სამსახურმა პროტესტის ნიშნად შესაძლოა, მუშაობა შეწყვიტოს აღნიშნულ საკითხთან დაკავშირებით, საინფორმაციო სამსახურის თანამშრომლები განცხადებას ავრცელებენ.

ისინი ახალი ამბების რედაქციის ხელმძღვანელის ირინა ყურუასთვის გაკეთებულ შეთავაზებას ტელევიზიის დატოვებაზე ზეწოლად აფასებენ. ბათუმის "პრესკაფეში" შეკრებილი არხის საინფორმაციო სამსახურის ჟურნალისტები, პროდუსერები და წამყვანები აცხადებენ, რომ აჭარის ტელევიზიის დირექტორი სოსო სტურუა საინფორმაციო სამსახურის მუშაობაზე ზეწოლას ახდენს.

როგორც აჭარის ტელევიზიის ახალი ამბების რედაქციის ხელმძღვანელი ირინა ყურუა აცხადებს, ტელევიზიის ხელმძღვანელის მიერ შეთავაზება რადიოს საინფორმაციო სამსახურში გადასვლასთან დაკავშირებით არის პირდაპირი ზეწოლა.

საკითხთან დაკავშირებით, აჭარის ტელევიზიის დირექტორი სოსო სტურუა ჟურნალისტებთან საუბრისას აცხადებს, რომ ტელევიზიის უფრო ეფექტური მუშაობისთვის რომელიმე თანამშრომლის პოზიციის ცვლილება თუ გახდება საჭირო, თანამშრომლებთან შეთანხმების საფუძველზე გააკეთებს.