გუშინ საქართველოში ჰელოუინი აღნიშნეს. დასავლეთის ქვეყნებში პოპულარული ეს დღესასწაული, ძირითადად, თბილისში აღინიშნა. რუსთაველის გამზირზე, ლესელიძის ქუჩაძე, ღამის კლუბ "სენატში" და სხვა საჯარო თავშეყრის ადგილებში ნიღბიანი ახალგაზრდები გამოჩნდნენ. წინა წლებისგან განსხვავებით, ჰელოუინის აღნიშვნას სერიოზული ინციდენტები არ მოჰყოლია, თუმცა, "ნიუპოსტის" ინფორმაციით, "ხინკლის სახლთან" სამმა მამაკაცმა ფიზიკური შეურაცხყოფა მიაყენა წყვილს, რომელიც დღესასწაულის აღსანიშნავად მანტიებსა და ნიღბებში იყო გამოწყობილი. კონფლიქტი საპატრულო პოლიციის ჩარევის შემდეგ განიმუხტა.

ჰელოუინი, რომელიც 31 ოქტომბერს აღინიშნება, დასავლური სამყაროს ერთ–ერთი უძველესი დღესასწაულია. ერთ დროს, კელტებისთვის ეს ყველაზე მნიშვნელოვანი დღე იყო, რომელთა შთამომავლებს შორის არიან ირლანდიელები, ვალიელები და შოტლანდიელები. ძველად ამ დღეს სამაინს უწოდებდნენ და სწამდათ, რომ გარდაცვლილთა სულები ერთი ღამით დედამიწაზე სახეტიალოდ თავისუფლდებოდნენ. ამ სულების გარდაცვლილთა სამყაროში გასაცილებლად და შესაშინებლად ხალხი კოცონს ანთებდა, პოტენციურად სახიფათო სულების დამშვიდებას კი ხალხი საკვების მიძღვნით ცდილობდა.