დეზერტირების ბაზრის მიმდებარე ტერიტორიაზე 13 შემოწმებული ობიექტიდან 11-ში ჰიგიენურ ნორმებთან შეუსაბამობა დადგინდა

ჯანმრთელობა - 13:57, 23 Feb, 2020

2367

სურსათის ეროვნულმა სააგენტოს ცნობით „დეზერტირების ბაზრის“ მიმდებარე ტერიტორიზე ხორცის 13 სარეალიზაციო ობიექტი შეამოწმეს და აქედან 11 ობიექტი სანიტარიულ-ჰიგიენური ნორმების დარღვევის, ხორცის შენახვისა და რეალიზაციის არასათანადო პირობების გამო დააჯარიმეს.

4 ობიექტს კრიტიკული შეუსაბამობის გამო საწარმოო პროცესი შეუჩერდა.
„მუდმივ რეჟიმში მიმდინარეობს ისეთი მაღალი რისკის სურსათის შემოწმება როგორც ხორცია. სააგენტოს ინსპექტირების ჯგუფები ყოველდღიურად ახორციელებენ კონტროლს და მონიტორინგს, განსაკუთრებით აგრარული ბაზრების მიმდებარე ტერიტორიაზე, სადაც გაურკვევლი წარმომავლობის ხორცის მოხვედრის რისკი მაღალია. უნდა აღინიშნოს რომ აქტიური კონტროლის და ინფორმირებულობის გაზრდის შედეგად, წინა წლებთან შედარებით, ვითარება გაუმჯობესებულია “- განაცხადა სურსათის ეროვნული სააგენტოს უფროსის მოადგილე ვასილ ბასილაძემ.

სურსათის ეროვნული სააგენტო აცხადებს, რომ აგრარული ბაზრების მიმდებარე ტერიტორიაზე „გაურკვეველი წარმომავლობის ხორცის მოხვედრის რისკი მაღალია“ და მომხმარებელს მოუწოდებს, არ შეიძინოს ხორცი ისეთ ადგილებში, სადაც არ არის დაცული შენახვისა და რეალიზაციის სათანადო პირობები.