2014 წლიდან იცვლება მეორე ჯგუფს მიკუთვნებული პრეპარატების აფთიაქიდან გაცემის წესები. 

ამ ჯგუფში შედის ანტიბიოტიკები, გულსისხლძრღვთა დაავადებების საშუალებები, სტეროიდული ჰორმონები, სტეროიდული პრეპარატები, რომლებსაც სააფთიაქო ქსელებში რეცეპტის გარეშე ვერ შეიძენთ, ხოლო არასრულწლოვანები იგივე პრეპარატებს ვერც რეცეპტით იყიდიან. 

ამ მეთოდებით სახელმწიფო ბრძოლას უცხადებს ე.წ. სააფთიაქო ნარკომანიას. ანდანტე, გრიმოდინი, ტებანტინი, ბაკლოსანი, ბაკლოფენი, გაბაგამა – ეს ის პრეპარატებია, რომლებსაც ხშირად და უმეტესწილად, მოზარდები აფთიაქებში ვეღარ შეიძენენ. აქამდე ისინი ამას უპრობლემოდ ახერხებდნენ და აბებს ნარკოტიკული თრობის მისაღწევად იყენებდნენ. 

პორტალი „საზოგადოება.ჯი“ ესაუბრა სამედიცინო საქმიანობის სახელმწიფო რეგულირების სააგენტოს ფარმაცევტული საქმიანობების ინსპექტირების სამმართველოს უფროსს დავით მაჭარაშვილს: 

"არსებობს მედიკამენტების სამი ჯგუფი. პირველ ჯგუფს მიეკუთნება კონტროლს დაქვემდებარებული საშუალებები, ფსიქოტროპული და ნარკოტიკული მედიკამენტები და ფსიქოაქტიური კომბინირებული საშუალებები. 

კანონმდებლობით დადგენილი იყო, რომ მათი გაცემა აფთიაქიდან უნდა მომხდარიყო ფორმა N1-ის, ნარკოტიკული საშუალებების და ფსიქოტროპული, ფსიქოაქტიური საშუალებების ფორმა N2-ისა და სარეცეპტო ბლანკით. მეორე ჯგუფის მედიკამენტების გამოყენება ექიმის დანიშნულების გარეშე არ შეიძლება. მათი გადაჭარბებული დოზით მიღება იწვევს ნარკოტიკულ თრობას. 

კანონმდებლობაში დამტკიცებული იყო, რომ მეორე ჯგუფისთვის მიკუთნებული ფარმაცევტული პროდუქტის გამოსაწერი რეცეპტის ფორმა N3-ია, მაგრამ იქვე არის ნონსენსური ჩანაწერი - ფარმაცევტს უფლება არ აქვს უარი თქვასაფთიაქიდან მედიკამენტის გაცემაზე რეცეპტის არწარმოდგენის შემთხვევაში. 

აქედან გამომდინარე, კანონმდებლობაში შევიდა ცვლილება, რომ 2014 წლის 1 იანვრიდან მეორე ჯგუფისთვის მიკუთვნებული ფარმაცევტული პროდუქტი აფთიაქიდან არ გაიცემა ექიმის მიერ გამოწერილი რეცეპტის გარეშე. ამის მოტივაცია არის ის, რომ ამ მედიკამენტებით მიიღწევა ნარკოტიკული თრობა. ამ მიმართულებით კანონმდებლობაში კონტროლის მექანიზმები არ არსებობს. არის აბსოლუტური ვაკუუმი. 

2014 წლის 1 იანვრიდან სავალდებულო იქნება ამ მედიკამენტებზე ექიმის რეცეპტის წარდგენა. მეორე ჯგუფს ასევე მიეკუთნება ანტიბიოტიკები, გულსისხლძრღვთა დაავადებების საშუალებები, სტეროიდული ჰორმონები, სტეროიდული პრეპარატები და ა.შ, რომლის გამოყენებაც ექიმის დანიშნულების გარეშე არ შეიძლება. 

კანონმდებლობაში შევიდა კიდევ ერთი ცვლილება, რომელიც ამოქმედდება 2014 წლის პირველი იანვრიდან. არასრულწლოვნებზე პირველ და მეორე ჯგუფის ფარმაცევტული პროდუქტი რეცეპტითაც კი არ გაიცემა. 

ამის მიზანი არის ის, რომ დღეის მდგომარეობით, ბევრი არასრულწლოვანი ყიდულობს ისეთ სამკურნალო საშუალებებს აფთიაქებში, რომლებიც გამოიყენება ნარკოტიკული თრობის მისაღწევად“, – განაცხადა მაჭარაშვილმა.