ინფექციურ საავადმყოფოში შეყვანილი ორი ჩინელიდან არც ერთს კორონავირუსი არ დაუდასტურდა და მალე ორივე კლინიკიდან გაეწერება

ჯანმრთელობა - 20:58, 07 Feb, 2020

3048

ინფექციური საავადმყოფოს გენერალური დირექტორის, თენგიზ ცერცვაძის თქმით, ორი ჩინელი მამაკაციდან, რომლებიც გუშინ ინფექციურში შეიყვანეს, კორონა ვირუსი არცერთს არ დაუდასტურდა, მათ დაუმთავრდათ ყველა გამოკვლევა და კატეგორიულად გამოირიცხა კორონა ვირუსით ინფიცირება.

ბატონი თენგიზის თქმით, თუ პაციენტებს მდგომარეობა არ გაუუარესდათ ისინი ხვალვე დატოვებენ საავადმყოფოს. მისი თქმით მათ აქვთ ჩვეულებრივი გაციებითი დაავადება.
„გუშინ, ღამის საათებში შემოყვანილ იქნა ორი ჩინელი ეროვნების ახალგაზრდა მამაკაცი. მათგან ერთი საქართველოში ჩამოვიდა 4 თებერვალს, მეორე 29 იანვარს, ისინი, რამდენადაც მე მაქვს ცნობა, მუშაობენ ახმეტაში და აუწიათ ტემპერატურა გუშინ და წამოიყვანეს ჩვენთან კლინიკაში. მათ დაუმთავრდათ ყველა გამოკვლევა. მათ არ აქვთ პნევმონია, რენდგენოლოგიური გამოკვლევით, არ აქვთ გრიპის ვირუსი, ზემო სასუნთქი გზებიდან აღებული მასალის გამოკვლევით და კატეგორიულად გამოირიცხა ახალი კორონავირუსით გამოწვეული ინფექცია. მათ აქვთ ჩვეულებრივი გაციებითი დაავადება, არა კორონავირუსით და არა გრიპის ვირუსით გამოწვეული.ორივე მათგანი რჩება ჩვენთან. ხვალამდე დავაკვირდებით, თუ რაიმე სიმპტომები არ გამოჩნდა, მდგომარეობა არ გაუარესდება, და არ გაუარესდება, რადგან ლაბორატორიულად მათ არაფერი არ აქვთ, ხვალ ორივე გაეწერებიან”,- განაცხადა ცერცვაძემ.