„საქართველოს ახალგაზრდა კონსტიტუციონალისტთა ასოციაციის“ შეფასებით 27 ოქტომბრის არჩევნები სამაგალითოა

საზოგადოება - 17:53, 29 Oct, 2013

1438

„საქართველოს ახალგაზრდა კონსტიტუციონალისტთა ასოციაციის“
შეფასებით 27 ოქტომბერს ხმის მიცემის პროცესი სერიოზული ექსცესებისა და
დარღვევების გარეშე, თავისუფალ გარემოში წარიმართა, რითიც აღნიშნული არჩევნები
სამაგალითოა. საარჩევნო პროცესს მთელი დღის განმავლობაში თბილისის მასშტაბით
ორგანიზაციის დამკვირვებლები უწევდნენ მონიტორინგს, რომელთა ანგარიშზე
დაყრდნობითაც საარჩევნო კანონმდებლობის არსებით დარღვევასა და სერიოზულ
პროცედურულ გადაცდომებს ადგილი არ ჰქონია. შეინიშნებოდა მხოლოდ მცირე
ტექნიკური ხასიათის ხარვეზები, რაც დაკავშირებული იყო მარკირების
პროცედურასთან და ერთ შენობაში რამდენიმე საარჩევნო უბნის განთავსებასთან.
ამასთან, აღსანიშნავია, რომ, სამწუხაროდ, ხმის მიცემის პროცესის განმავლობაში
შეინიშნებოდა მოქალაქეთა პასიურობა, რასაც ასოციაციის წარმომადგენლები
წინასაარჩევნო პერიოდის შეფასებისასაც პროგნოზირებდნენ.

„საქართველოს ახალგაზრდა კონსტიტუციონალისტთა ასოციაცია“
მიიჩნევს, რომ 27 ოქტომბრის საპრეზიდენტო არჩევნები უნდა იქცეს სერიოზულ
წყალგამყოფად საქართველოს უახლეს ისტორიაში და ქვეყანაში დემოკრატიული
ინსტიტუტების განვითარებამ შეუქცევადი ხასიათი უნდა მიიღოს. ამ კუთხით
განსაკუთრებით მნიშვნელოვანია სახელმწიფო ინსტიტუციებისა და არასამთავრობო
ორგანიზაციების მხარდამხარ საქართველოს თითოეული მოქალაქის აქტიური
მონაწილეობა ძლიერი სამოქალაქო საზოგადოების ჩამოყალიბების საქმეში. ყველამ
უნდა გააცნობიეროს თავისი წილი პასუხისმგებლობა სახელმწიფოს წინაშე და
აქტიურად ჩაერთოს ისეთ მნიშვნელოვან პროცესებში როგორიცაა: მომავალ წელს
დაგეგმილი ადგილობრივი თვითმმართველობის არჩევნები, დაანონსებული
საკონსტიტუციო რეფორმა, სახელმწიფო სტრუქტურების საქმიანობის კონტროლისთვის
საზოგადოებრივ საწყისებზე დაფუძნებული ინსტიტუტების ფორმირება.

ყოველივე ზემოთქმულიდან გამომდინარე ასოციაცია იმედოვნებს, რომ
სამომავლოდ, ერთიმხრივ, მოსახლეობაში აღარ ექნება ადგილი ისეთი მასშტაბების
ნიჰილიზმს საარჩევნო პროცესისადმი, როგორც ეს აქამდე შეინიშნებოდა, ხოლო,
მეორემხრივ, საქართველოს საარჩევნო ადმინისტრაცია იზრუნებს საარჩევნო
პროცედურების სრულყოფაზე, რასთან დაკავშირებითაც ორგანიზაცია რამდენიმე
რეკომენდაციას გაცემს:

· სასურველია, საუბნო საარჩევნო კომისიები განლაგებული იყოს
სხვადასხვა შენობებში, რათა, თავიდან იქნეს აცილებული ამომრჩევლის
გაურკვევლობაში აღმოჩენა;

· დასახვეწია მარკირების პროცედურა;

· საჭიროა საარჩევნო ადმინისტრაციის მოხელეთა კვალიფიკაციის ამაღლება,
იმისათვის რომ მათ უფრო ეფექტურად შეძლონ უფლებამოსილებათა განხორციელება;

· აუცილებელია აგრესიული სააგიტაციო კამპანიის წარმოება საარჩევნო
პროცესის მნიშვნელობის მიმართ მოქალაქეთა ცნობიერების ასამაღლებლად, მათ
შორის, საგანმანათლებლო პროექტების განხორციელება.