ოკუპირებულ აფხაზეთთან, ხურჩა-ნაბაკევის ადმინისტრაციულ საზღვართან რუსმა ოკუპანტებმა „მოამბის“ გადამღებ ჯგუფს ნატო ბერულავასა და გიგა კილასონიას შემადგენლობით გადაადგილების საშუალება არ მისცეს და იარაღით ემუქრებოდნენ.

ქართველი ჟურნალისტების დასახმარებლად სპეცრაზმის მობილიზება გახდა საჭირო - „მოამბის“ გადამღებმა ჯგუფმა ადმინისტრაციული საზღვრის მიმდებარე ტერიტორიის დატოვება მხოლოდ იმის შემდეგ შეძლო, რაც იქ ქართული სპეცრაზმი გამოჩნდა.

ინციდენტი ოკუპირებული აფხაზეთის მიმდებარე ტერიტორიაზე მოხდა და „მოამბის“ ჯგუფი ადგილზე ცდილობდა გარკვევას, რამდენად შეესაბამებოდა სინამდვილეს ინფორმაცია იმის შესახებ, რომ ოკუპირებულ ტერიტორიაზე, სოფელ ნაბაკევში 25 ქართველი ე.წ. საზღვრის გადალახვისთვის დააკავეს და გალის მიმართულებით წაიყვანეს.

ამ დროისთვის ნატო ბერულავასა და გიგა კილასონიას საფრთხე არ ემუქრება - ისინი სპეცრაზმელებმა მაღალი რისკის ადგილს გაარიდეს. ნაბაკევის მხრიდან ხურჩასთან მობილიზებულია ოკუპანტების დამატებითი ძალები, იქვე არიან აფხაზეთის ე.წ. შსს-ს წარმომადგენლები.

შეგახსენებთ, რომ დღეს გავრცელდა ინფორმაცია იმის შესახებ, რომ ოკუპირებულ ტერიტორიაზე რუსმა სამხედრო პირებმა ქართველები დააკავეს, სასტიკად სცემეს და 2.000 რუბლის ოდენობით ჯარიმა გადაახდევინეს.

„ნიუპოსტის“ ინფორმაციით, ნაბაკევში ქართველების დაკავების პროცესი ამ დრომდე გრძელდება. 

შენიშვნა: ფოტოზე გამოსახულია კონფლიქტის ზონის ერთერთი მონაკვეთი: ორსანტია-ოტობაიას დამაკავშირებელი ხიდი