ქართული ეკლესიებიდან გაზიდული ძვირფასეულობა ერმიტაჟშია გამოფენილი, დიდი ნაწილი კი საცავებში ინახება

სოც.მედია - 14:12, 24 Jan, 2020

2889

ქართული ეკლესიებიდან რუსი ეგზარქოსებისა და სხვა ჩინოვნიკების მიერ სხვადასხვა დროს გაზიდული ძვირფასეულობა ერმიტაჯშია გამოფენილი, მაგრამ ეს ამ ნაძარცვის მხოლოდ მცირე ნაწილია - ერმიტაჟის საცავებში, სავარაუდოდ, დაახლოებით 150 მილიონი მანეთის (სსრკ-ს კურსის) ექსპონატები ინახება, - ამის შესახებ დანიელ სავანელი "ფეისბუქში" წერს.

„რევოლუციამდელი საქართველოდან, რუსეთში გატანილი ქართული საგანძურის და ექსპონატების, ძალიან უმნიშვნელო ნაწილი გამოფენილია ერმიტაჟში. იგი არის იმ აურაცხელი ქონების, ძალიან მცირე ნაწილი, რომელიც რუსეთის იმპერიამ გაიტანა საქართველოდან.
რევოლუციამდელი ქართველი მეცნიერის, თეოლოგიის დოქტორისა და საზოგადო მოღვაწის, მიხეილ თამარაშვილის გამოკვლევით და გაანგარიშებით, რუსმა ეგზარხოსებმა ქართული ეკლესიებიდან 137 მილიონი მანეთის ძვირფასეულობა გაიტაცეს. ასევე მეცნიერის, ისტორიკოსისა და მკვლევარის, ნიკოლოზ დურნოვოს გამოკვლევით, ჯერ მარტო 1907 წლამდე, რუსეთის მთავრობამ, ეგზარხოსების მეშვეობით ქართველ ერს, მაშინდელი შეფასებით 150 მილიონი მანეთის ღირებულების ძვირფასეულობა წაართვა. ნიკოლოზ დურნოვო საბოლოოდ კრემლის ბრძანებით, კომუნისტებმა დახვრიტეს 1937 წელს, 1938 წელს კი, ასევე დახვრიტეს მისი ორი ვაჟი-შვილი.
ერმიტაჟში არსებული ქართული საგანძურის ეს მცირე ნაწილი, წლების მანძილზე ერმიტაჟის სათადარიგო საცავებში ინახებოდა, მხოლოდ 2006 წლიდან მოხდა მათი ოფიციალური გამომზეურება და მუდმივ საექსპოზიციო ექსპონატებად გამოფენა. ვინ იცის, კიდევ ქართული საგანძურის რამდენი ექსპონატი არის ერმიტაჟის საცავებში გადანახული, რომელებიც მიზეზთა გამო, ჯერ კიდევ არ გამოუმზეურებიათ.
ერმიტაჟში დღეისათვის უკვე გამოფენილი, დღემდე შემორჩენილი ქართული საგანძურის ეს ფოტოები, მოწოდებულია და გადაღებულია, სანქტ-პეტერბურგელი ფოტოგრაფის დენის ბელეცკის მიერ“, – წერს დანიელ სავანელი და ფოტოებს აქვეყნებს.