ლავასოღლის თებერვალში გაათავისუფლებენ - რა პასუხი აქვს პროკურატურას და რას ამბობს ადვოკატი

სამართალი - 14:12, 17 Jan, 2020

1759

ე.წ. კრიმინალურ ავტორიტეტს, მინდია გორაძეს იგივე ლავასოღლის თებერვალში გაათავისუფლებენ, რადგან საექსტრადაციო პატიმრობის ვადა იწურება - ამის შესახებ "კანონიერი ქურდის" ადვოკატმა ალექსანდრე კობაიძემ განაცხადა.

ლავასოღლის ადვოკატის თქმით, საქართველომ ვერ წარადგინა საკმარისი მტკიცებულებები, რაც დაადასტურებდა იმას, რომ ლავასოღლი ექსტრადაციის წესით საქართველოს უნდა გადმოსცენ.

„საექსტრადაციო სასამართლო თავდაპირველად ტრაბზონში გაიმართა და ლავასოღლი გაუშვეს, თუმცა იმავე დღეს უკან შეაბრუნეს… ახლა უკვე მის საქმეს სტამბოლის სასამართლო განიხილავს. გადაწყვეტილება მიღებული არ არის, მაგრამ თებერვალში ვადა იწურება, უნდა გაუშვან,“ - განმარტავს ადვოკატი.

ამასთან საინტერესოათურქული გაზეთი "საბაჰი" თურქეთის საგარეო საქმეთა სამინისტრტოზე დაყრდნობით წერს, რომ სტრაპზონში დაკავებული ქართველი "კანონიერი ქურდი", საპყრობილეს საქართველოს ხელისუფლების უმოქმედობის გამო ტოვებს.

საქართველოს გენერალურ პროკურატურაში კი აცხადებენ, რომ 2018 წლის 27 ნოემბრიდან, როცა უწყებამ ლავასოღლის ექსტრადაცია ოფიციალურად მოითხოვა, ამ დრომდე ოფიციალური თურქეთისგან არ მიუღიათ პასუხი ექსტრადაციის თაობაზე.

პროკურატურაში ირწმუნებიან, რომ მათ ყველა ოფიციალური დოკუმენტი მიაწოდეს თურქეთს და დამატებითი ინფორმაციის მიწოდება თურქეთს არ მოუთხოვია.

„საქართველოს მთავარი პროკურატურის მიერ თურქულ მხარეს სრულყოფილად წარედგინა ყველა ის ინფორმაცია და დოკუმენტაცია, რომელიც გათვალისწინებულია ექსტრადიციის სფეროში ორ სახელმწიფოს შორის არსებული შესაბამისი საერთაშორისო ხელშეკრულებებით. დღეის მდგომარეობით საქართველოს გენერალურ პროკურატურას თურქული მხარისგან არ მიუღია ოფიციალური პასუხი ძებნილი პირის საქართველოში ექსტრადიციასთან დაკავშირებით საბოლოო გადაწყვეტილების თაობაზე. საექსტრადიციო პროცედურების მიმდინარეობისას, თურქულ მხარეს ქართველი კოლეგებისგან ასევე არ გამოუთხოვია რაიმე სახის დამატებითი ინფორმაცია მინდია ლავასოღლის ექსტრადიციის საკითხთან დაკავშირებით,“ - აღნიშნავენ უწყებაში.